Фарғона вилоятида ички ишлар бошқармасининг махсус жанговар бўлинмалари томонидан қуролланган жиноятчиларни қўлга олиш ва гаровга олинган фуқароларни озод қилиш бўйича махсус-тактик ўқув машғулоти ўтказилди. Бу ҳақда вилоят ИИБ матбуот хизмати маълумотига таяниб, «Дарё» мухбири Азизжон Эрматов хабар бермоқда.
Жамоат тартибини сақлаш, фуқаролар хавфсизлигини таъминлаш, ҳуқуқни муҳофаза қилувчи идораларнинг жанговар шайлигини кўрикдан ўтказиш мақсадида ташкилланган ўқув машғулоти давомида бир гуруҳ қуролланган шахслар ўқув биносини эгаллаб олди. Террорчилик ҳаракатлари содир этишни мақсад қилган жангариларни қўлга олиш ва уларни зарарсизлантириш бўйича махсус операция ўтказилиб, гаровга олинган шахслар озод этилди.
Фарғона ва Қўқон шаҳарларида, Ўзбекистон туманида ўта хавфли ва қуролланган жиноятчиларни қўлга олиш, улар томонидан гаровга олинган фуқароларни озод этиш жарёнида қўмондонлик штабининг фаолияти ўрганилди. Фавқулодда вазиятлар содир бўлганда шахсий таркибнинг тўғри қарор қабул қилиши, белгиланган вазифа ва топшириқларни маҳорат билан бажариши кўрикдан ўтказилди.
Ўқув машғулоти давомида махсус вазифаларни бажарувчи сафарбарлик отряди хизматчиларининг амалий кўникмалари намойиш қилинди.
Изоҳ (0)