Қорақалпоғистонда хонадонларга ис гази тарқалишида хабардор қилувчи восита — ис гази детекторлари ўрнатилмоқда. Бу ҳақда ЎзА хабар берди.
—Янги турар жойлар қурилишида қўллашга мўлжалланган ис гази тарқалишида хавфсизликни таъминловчи қурилмалар келтирилмоқда, — дейди Қорақалпоғистон Республикаси ИИВ Ёнғин хавфсизлиги бошқармаси бошлиғи Азамат Давлетов. — Бу қурилма универсал ҳимоя воситаси бўлиб, ёнувчи метан, пропан, бутан ва заҳарли ис газларини автоматик тарзда аниқлаб, белгиланган миқдори ортиб кетган тақдирда махсус клапан орқали газни тармоқдан узиб қўяди. Натижада хонага ортиқча газ тўпланишига йўл қуйилмайди. Ушбу ускуна сизиб чиққан газ хавфи бартараф этилгунга қадар огоҳлантирувчи овозли сигнал бериб туради. Қурилма электр энергияси билан ишлайди. Агар электр таъминоти узилган тақдирда, ўзидаги аккумулятор ёрдамида 24 соатгача мустақил, яъни электр энергиясиз узлуксиз ишлаши мумкин.
Ҳудудда амалга оширилаётган ушбу тадбир Президентнинг 2018 йил 12 декабрдаги «Жисмоний ва юридик шахслар мулкининг қўриқланишини таъминлаш самарадорлигини ошириш чора-тадбирлари тўғрисида»ги қарори ижроси доирасида амалга оширилмоқда. Қарорда 2022 йил 31 декабрга қадар янги турар жойлар газоанализаторлар билан жиҳозланиши кераклиги кўрсатилган.
Изоҳ (0)