Чироқчи туман ФҲДЁ бўлими мудираси Озода Жумаеванинг маълум қилишича, туманда эндигина дунёга келган 555 нафар чақалоққа туғилганлиги тўғрисидаги гувоҳнома туғуруқхонадан чиқиш вақти эмас, ёшга тўлгандан сўнг, баъзан уч ёшга тўлгачгина олинган. Мудиранинг сўзига кўра, бунга ота ёки онанинг фуқаролик паспорти йўқлиги ёки бўлмаса отаси хорижга чиқиб кетгани сабаб бўлган.
«Дунёга келган чақалоқнинг Ўзбекистон фуқароси эканини тасдиқловчи туғилганлик тўғрисидаги гувоҳномани беришда биргина ФҲДЁ бўлими эмас, балки бошқа бир қатор ташкилотлар ҳам ўзларида масъулиятни ҳис қилиши лозим, — дейди Чироқчи туман ФҲДЁ бўлими мудири Озода Жумаева. — Айтмоқчиманки, маҳалла фуқаролар йиғинлари оқсоқоллари, ота-оналарнинг ўзлари ҳам дунёга келган чақалоғининг ёши 2–3 га тўлгунча гувоҳнома олинмаганлигида ўзларини ҳам айбдор санасалар яхши бўларди».
Озода Жумаеванинг маълумот беришича, 2018 йилда Чироқчи туманида дунёга келган 9250 нафар чақалоқнинг 900 нафари ёлғиз онадан туғилган. Бу 900 нафар гўдак қонуний никоҳ қайд этилмаган ҳолда туғилганини англатади.
Туман ФҲДЁ бўлими мудирасининг сўзига кўра, 900 нафар ёлғиз онадан туғилган чақалоқ шаръий никоҳдан ўтган оилада дунёга келган бўлиб, гўдакнинг отаси ёки онасининг паспорти йўқлиги сабаб никоҳ қайд этилмасдан қолган. Аммо мутасаддилар ҳаракати билан 900 нафар ёлғиз онанинг 712 нафари билан қонуний никоҳ қайд этилишига эришилган.
Туман ФҲДЁ бўлими тақдим этган маълумотларга кўра, туманда ажралишлар сони 2017 йилда 155 тани ташкил этган бўлса, 2018 йилда бу кўрсаткич 95 тани кўрсатган.
Изоҳ (0)