Бухоро вилоятининг Пешку тумани ҳокимлиги биносида 2018 йил 13 июнь куни «Қизил ярим ой» жамияти Пешку туман бўлими бошлиғи Гулбаҳор Ашурова пичоқ билан етказилган жароҳатлари туфайли вафот этганди. Ушбу қотилликка рашк сабаб бўлган.
Когон туманидаги «Янги ҳаёт» қишлоғи фуқароси, 1979 йилда туғилган Фахриддин Умаров «Қизил ярим ой» жамиятининг Пешку туман бўлими ижрочи директори, 1974 йилда туғилган Гулбаҳор Ашурова билан 2017 йилнинг бошида Telegram орқали танишган. Кўп ўтмай, Когон шаҳрининг Ватанпарвар кўчасидаги 22-уйда ноқонуний эр-хотин сифатида ижарада яшаб келишган. Умаровнинг 9 яшар ўғли Ашуровани ўз онаси сифатида қабул қилган. Аммо Ашурова Умаров билан ўртасидаги бу муносабатларни фарзандлари ва яқин қариндошларидан яшириб келган. Ашурова учинчи ўғлини уйлантиргандан сўнг расмий никоҳдан ўтишини айтган.
Бироқ Ашурова бир пайтнинг ўзида Когон шаҳар Мудофаа ишлари бўлимида ишлаган Б.Мўминов билан ҳам ишқий муносабатда бўлиб келган. Умаров бу ҳақда эшитиб, хиёнатга ойдинлик киритиш мақсадида унинг ҳақиқатга қанчалик яқинлигини билиш учун Б.Мўминовдан сўраган ва ундан Г.Ашурова билан олти йилдан буён ишқий муносабатда учрашиб келаётганлиги ҳақида жавоб олган. Уларнинг учаласи ўзаро учрашган пайтда аёл ишқий муносабатлар ҳақидаги гапларни рад этиб, кетиб қолган.
Судда Умаровнинг кўрсатмасига кўра, унга Мўминов зарар етказмаслиги учун Ашурова Россияга бориб ишлаб туришни маслаҳат беради. Ашурова Умаровнинг ортидан етиб бориши ва бирга яшашни бошлашлигини айтади. 2018 йилнинг май ойида Умаров ўғлини опасига ташлаб Россияга жўнаб кетади.
Умаровнинг опаси суддаги кўрсатмасида у укаси ва синфдоши бўлган Ашурованинг муносабатларидан хабардор бўлганини билдирган. Укаси Ашурова билан оила қурмоқчи эканлигини ҳам айтган. Бироқ кейинчалик Умаров Ашурова билан муносабатларини узгани, бунга аёлнинг хиёнати сабаб эканини айтган.
Россияда яшаб юрган Умаровнинг қўнғироқларига Ашурова жавоб бермай қўйган. Умаров Ашурова ва Мўминов ўз муносабатларини давом эттираётганидан гумонсираб 2018 йилнинг 12 июнь куни Бухорога қайтиб келган. Ўша куни Умаров Ашуровани иш жойидан топа олмайди, у билан телефонлашиб усиз яшай олмаслигини айтган. Аммо улар тортишиб қолгач, аёл телефонни ўчириб қўйган ва қўнғироқларга жавоб бермай қўйган. Опасининг уйида тунаб қолган Умаров эртаси куни агар Ашурова Мўминовни танласа, уни ўлдиришни режалаштириб ошхона пичоғини олиб Пешку тумани ҳокимлиги биносига йўл олган.
Умаров Ашурованинг хизмат хонасига кирган, улар биргаликда ҳокимлик биносининг орқа ҳовлисига чиқиб кетган. Умаров аёлдан ё уни ёки Мўминовни танлашни талаб қилган, аёл Мўминовни танлаганини айтганидан сўнг Умаров жаҳл устида рашк туфайли Ашуровага бир неча марта пичоқ урган. Аёл йиқилиб тушганидан кейин унинг устига чиқиб яна бир неча марта пичоқ санчган.
Пешку тумани ҳокимлиги биносининг 2-қаватида ишловчи Ўзини-ўзи бошқариш органлари фаолиятини мувофиқлаштириш бўйича Пешку туман кенгаши раисининг диний-маърифий масалалар бўйича ўринбосари Н.Шукурова ташқаридаги шовқинни эшитиб деразадан қараганида Умаров ерда ётган Ашурованинг устига чиқиб олиб, аёлни пичоқлаётганини кўрган. Шукурова стул олиб ойнадан отган, стул Умаровнинг белига теккан. Кейин Умаров ўрнидан туриб «Хиёнат қилган аёлнинг жазоси шу» деб айтган. Чап ва ўнг томон кўкрак қафасига 2 маротаба, қорин бўшлиғига 1 маротаба ҳамда бел соҳасига 2 маротаба пичоқ урилган Ашурова воқеа жойида вафот этган.
Судда Ашурованинг ўғилларидан бири тўйи куни Умаров билан танишгани, ўша куни Умаров ошпазлик қилганини, Мўминовни эса таксичи сифатида билиши, у оиланинг яқин таниши эканлигини айтган. Аммо онаси Умаров ёки Мўминов билан муносабатда бўлгани ҳақидаги гаплар Умаровнинг уйдирмаси эканлиги, Умаров улардан 25 миллион сўм ўғирлаб, жиноятни яшириш учун онасини ўлдирганлиги ҳақида кўрсатма берган.
Умаровнинг телефони текширилган вақтда ундан марҳума Ашурова билан ишқий ёзишмалар, телефон заставкаси ва галереясида Ашурованинг суратлари ҳам чиққан. Умаров судда айбига тўлиқ иқрор бўлиб, қилган ишидан пушаймонлигини билдириб, Ашурованинг яқинларидан кечирим сўради.
Жиноят ишлари бўйича Бухоро вилояти судининг 2018 йил 17 сентябрь кундаги мажлисида қотилга нисбатан ҳукм ўқилди. Ҳукмга кўра, Фахриддин Умаров Ўзбекистон Республикаси Жиноят Кодекси 97-моддасининг биринчи қисми (қасддан одам ўлдириш) бўйича айбли, деб топилиб, унга нисбатан 14 йил озодликдан маҳрум қилиш жазоси тайинланди. Шунингдек, Умаровнинг 9 ёшли ўғлига қонунда белгиланган тартибда васий тайинлаш масаласи Когон тумани Халқ таълими бўлими васийлик ва ҳомийлик органи зиммасига юклатилди.
Изоҳ (0)