Нукусда Шимоли-ғарбий ҳарбий округи ташкил этилганининг 20 йиллигига бағишланган тадбир бўлиб ўтди. Бу ҳақда ЎзА хабар берди.
Унда давлат ва жамоат ташкилотлари вакиллари, ҳарбий хизматчилар ва уларнинг оила аъзолари, ёшлар иштирок этди.
— Давлат раҳбари 2018 йил ноябрь ойида Қорақалпоғистонга ташрифи чоғида Шимоли-ғарбий ҳарбий округда ҳарбийлар билан учрашиб, уларга яратилган шароитларни янада яхшилаш бўйича кўрсатмалар берган эди, — дейди ҳарбий округ қўмондони, полковник Фарҳод Ортиқов. — Ушбу вазифалар ижроси доирасида кенг кўламли ишлар амалга оширилмоқда. Президентнинг тегишли фармони билан ҳар бир ҳудудда ҳарбий-маъмурий секторлар тузилгани фаолиятимизда муҳим аҳамият касб этмоқда.
Ўтган йили Шимоли-ғарбий ҳарбий округида 36 миллиард сўмдан зиёд маблағ ҳисобидан қурилиш-таъмирлаш ишлари олиб борилиб, зарур инвентарлар билан таъминланди. Энг муҳими, ҳарбий хизматчиларни ижтимоий қўллаб-қувватлаш, уларнинг оила аъзолари учун қулай шароит яратиш устувор йўналишлардан бирига айланган.
Ўтган қисқа вақт ичида ҳарбий хизматчилар учун 66 хонадонли 3 та кўп қаватли уйда қурилиш ишлари олиб борилди. Бу ишлар жорий йилда ҳам давом эттирилиб, 120 хонадонга мўлжалланган 4 та кўп қаватли уй қурилиши режалаштирилган.
Тадбирда сана муносабати билан бир гуруҳ ҳарбийларга навбатдаги ҳарбий унвон, кўкрак нишони, Мудофаа вазирлиги ва Шимоли-ғарбий ҳарбий округнинг фахрий ёрлиқлари топширилди.
Изоҳ (0)