Сурхондарёда фуқаро Ж.Ф. Ўзбекистонга хорижий автотранспорт воситаси ҳисобланган Lacetti автомобилини олиб кирар экан, бу жараёнда машинани мамлакат ҳудудидан қайта олиб чиқиб кетиш мажбуриятини зиммасига олади. Бироқ бу мажбуриятни бир зумда унутиб, автомашинани эҳтиёт қисмларга бўлаклаган ҳолда 1700 АҚШ долларига сотиб юборади. Бу ҳақда Божхона қўмитаси ахборот хизмати хабар берди.
Автомобилни олиб чиқиш муддатлари яқинлашганда эса сувдан қуруқ чиқиш мақсадида божхоначиларнинг кўзини шамғалат қилишга уринади. Яъни, бундан бир неча йиллар муқаддам ёниб кетган бошқа бир Lacetti кузовини кўрсатган ҳолда давлат божхона хизмати органлари ходимларини ушбу машинанинг гўёки ёнғин оқибатида бутунлай ёниб кетганига ишонтиришга уринади.
Синчковлик билан ўтказилган текширишда унинг содир этган ҳуқуқбузарлиги фош бўлгач, ушбу шахс вазиятдан чиқишнинг бошқа йўлларини излашга тушади. Яъни, ушбу ҳолатни «босди-босди» қилиш учун божхона ходимига 400 АҚШ доллари пора таклиф қилади.
Мазкур ҳолат юзасидан ўтказилган тезкор тадбир давомида ушбу шахс божхона ходимига таклиф қилинган поранинг 300 долларини бераётган вақтида Сурхондарё вилояти божхона бошқармаси тезкор ходимлари ҳамда Бош прокуратура ҳузуридаги департамент вилоят бошқармаси ходимлари билан ҳамкорликда воқеа жойида ашёвий далиллар билан қўлга олинди.
Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Изоҳ (0)