Истанбулдаги саккиз қаватли бинонинг қулаши оқибатида ҳалок бўлганлар сони 21 кишига етди. Бу ҳақда Туркия ички ишлар вазири Сулаймон Сойлуга таяниб, «РИА Новости» хабар бермоқда.
Унинг таъкидлашича, вайроналар остидан 14 нафар жароҳатланганлар олиб чиқилган. Дастлабки маълумотларга кўра, ҳодиса вақтида бинода 35 киши бўлган, уларнинг барчаси топилган. Қидирув-қутқарув ишлари эса давом эттирилади.
Аввалроқ, Истанбул губернатори Али Ерликайя қутқарув амалиётида турли идоралардан 500 га яқин ходимлар иштирок этганини, прокуратура фавқулодда ҳолат бўйича тергов ўтказганлигини маълум қилган эди. Бинонинг қулашига эҳтимолий сабаб сифатида эса юқори қаватлардаги ноқонуний қурилмалар келтирилмоқда. Туркиянинг атроф-муҳит ва шаҳарсозлик вазири Мурат Қурумнинг айтишича, уйнинг қурилишида ишлатилган бетонда катта миқдорда денгиз қуми топилган.
Эслатиб ўтамиз, Туркиянинг Истанбул шаҳридаги саккиз қаватли бино 6 февраль куни қулаб тушган эди.
Изоҳ (0)