Адлия вазирлиги делегацияси Беларусь пойтахти Минскда бўлиб ўтган «Адлия органларининг ҳуқуқий давлатни шакллантиришдаги роли» мавзусидаги халқаро конференцияда иштирок этди. Бу ҳақда «Дарё»га вазирлик жамоатчилик билан алоқалар бўлими маълум қилди.
Мазкур конференция Беларусь адлия вазирлигининг 100 йиллиги муносабати билан ташкил этилди. Унда Беларусь, Россия, Ўзбекистон, Тожикистон, Озарбайжон, Грузия адлия органлари раҳбарлари, ҳуқуқ ва халқаро муносабатлар, адвокатура, нотариат, парламент соҳасидаги дунёнинг етакчи экспертлари қатнашди.
Улар томонидан адлия соҳасини ривожлантиришнинг муҳим тенденциялари кўриб чиқилди. Юридик хизматлар ва медиация соҳаларини ташкил этиш ҳамда ривожлантириш бўйича фикр ва тажриба алмашилди.
Адлия вазирининг биринчи ўринбосари Маҳмуд Истамов тадбирда Ўзбекистонда суд-ҳуқуқ тизимида, қонун устуворлигини таъминлаш, вазирлик фаолиятини такомиллаштириш бўйича амалга оширилаётган ислоҳотлар мавзусида маъруза қилди.
Конференция доирасида Ўзбекистон делегацияси Минск шаҳар нотариал идорасида бўлиб, унинг фаолияти билан яқиндан танишди.
Маҳмуд Истамов бошчилигидаги Ўзбекистон делегацияси Беларусь адлия вазири Олег Слижевский билан учрашди. Учрашув чоғида томонлар кўплаб масалалар бўйича ўзаро манфаатли ҳамкорликни янада ривожлантириш, суд-ҳуқуқ соҳасида тажриба алмашишнинг долзарб жиҳатларини муҳокама қилди.
Изоҳ (0)