Хоразм вилоятининг Хонқа туманида истиқомат қилувчи, 1992 йилда туғилган I.С. олтин буюмларга қизиқишини, уларни сотиб олишини айтиб, фуқаро I.Ю.ни алдаб, 31,5 миллион сўмлик тилла буюмларни олиб кетиб, қайтариб бермаган. Бу ҳақда жиноят ишлари бўйича Хонқа туман суди раиси Мақсудбек Қиличев «Дарё»га маълум қилди.
У, шунингдек, фуқаро Г.Ў.нинг бўйнидаги вазни 15 грамм, баҳоси 3,45 миллион сўм бўлган тилла занжирни кўриб, бир-икки кун тақиб, қайтариб беришини айтиб олган, сўнг тилла занжирни бошқа фуқаро — З.Ж.нинг уйига олиб бориб, занжир ўзиники эканини, агар ундан олган пулини қайтариб бермаса, бемалол сотиб юбориши мумкинлигини айтган.
Маълум бўлишича, I.С. фуқаро З.Ж.дан 9 миллион сўм ва 200 доллар (жами 10,62 миллион сўм) пул олган. Шунингдек, фуқаро Н.V.дан 8 миллион сўм ва 7 минг доллар, фуқаро М.У.дан 1900 доллар, фуқаро Я.М.дан 2000 доллар пул олган.
У бу пулларнинг барини ўзини Янгибозор туманидаги «Ҳурлиқо» келин либослари салони эгаси сифатида таништириб, олган пулларига Туркиядан келин либослари олиб келиб, либослар ижарасидан кўп пул топишини, шундан кейин пулларни қисқа муддатда (бир ойда) қайтариб беришини ваъда қилиб олган.
Фуқаро I.С.нинг хатти-ҳаракатларига жиноят ишлари бўйича Хонқа туман суди томонидан баҳо берилган. У Жиноят кодексининг 168-моддаси 3-қисми «а», «б» бандларига (такроран ёки хавфли рецидивист томонидан кўп миқдорда содир этилган фирибгарлик) асосан айбли деб топилиб, 5 йил муддатга озодликдан маҳрум этилган.
Изоҳ (0)