Самарқандда 2 та автомобилни ўғирлаб, уларни эҳтиёт қисмларга бўлиб сотиб юборган шахснинг суди бўлиб ўтди.

Фото: Google Images

Ғулом Ҳамроқулов 2018 йилнинг 14 июль куни соат тахминан 12:30 атрофида Самарқанд шаҳрида Имом Бухорий кўчасида жойлашган автотураргоҳда У.К.га тегишли бўлган Nexia машинасини олиб қочиб кетган. У автомашина ичида бўлган 160 АҚШ доллари, 1100 Россия рубли, 500 000 сўм пул ҳамда 480 000 сўмлик озиқ-овқат маҳсулотларини яширин равишда талон-торож қилган. Шунингдек, У.К. ва З.Ҳ.га тегишли бўлган зарур ҳужжатларни ҳамда автомобилнинг давлат рақамини яшириб қўйган. Автомилни эса эҳтиёт қисмларга бўлиб сотиб юборган.

Ўзининг жиноий ҳаракатларини давом эттирган Ғулом Ҳамроқулов 2018 йилнинг 26 июль куни соат тахминан 11:30 атрофида Самарқанд шаҳар «Шодиёна» савдо мажмуаси олдида фуқаро З.Б.га тегишли бўлган Nexia автомашинасини яширин равишда олиб қочиб кетган. З.Б.га тегишли бўлган зурур ҳужжатларни йўқ қилиб, автомашинанинг ўриндиқлари, диск ва шиналари, эшик қопламалари ва автомашина эҳтиёт қисмларини сотиб, пулларни ўзининг эҳтиёжлари учун сарфлаб юборган.

«Дарё» мухбири Фарҳод Норбўтаевнинг хабар беришича, Жиноят ишлари бўйича Самарқанд шаҳар судида Ғулом Ҳамроқуловнинг жиноят иши юзасидан суд мажлиси бўлиб ўтган. Судья Зарифа Аҳмедова раислигида ўтказилган суд мажлисида судланувчи Ғулом Ҳамроқулов ўз айбига тўлиқ иқрорлик билдирди. Унинг айби суд мажлисида сўроқ қилинган жабрланувчилар ва гувоҳларнинг кўргазмалари билан тўлиқ исботланди.

Суд ҳукмига кўра, Ғулом Ҳамроқулов Жиноят Кодексининг 267-моддаси (Транспорт воситасини олиб қочиш) 2-қисмининг «а,г» ва 227-моддаси (Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) 2-қисмининг «а» банди билан айбли деб топилиб 6 йил 6 ой муддатга озодликдан маҳрум қилиш жазоси тайинланди.