Дунёдаги энг қиммат заргарлик буюмлари олмосдан ишланади ҳамда қимматбаҳо тош қанчалик ёрқин ва ноёб бўлса, тақинчоқ ҳам шунчалик қиммат бўлади. Бундай бойликларнинг ўзига яраша тарихи ҳам бор, дея ёзади Sputnik.
1952 йилда машҳур Cartier француз фирмаси оникс ва олмослардан тайёрланган пантерра шаклида билагузук ишлаб чиқарган. У нозик таъби ва нафосати билан машҳур бўлган Виндзор герцогиняси Уоллис Симпсонга тегишли бўлган. Билагузукни унга Англия қироли Эдуард VIII совға қилган эди. Қирол герцогиняга бўлган севгиси сабаб тахтдан воз кечган. 2010 йилда Sotbis кимошди савдосида 19,5 сантиметр узунликдаги билагузукни исми маълум қилинмаган бир харидор сотиб олган. Бир неча тошлари тушиб қолган бўлишига қарамай, харидор уни бошланғич нархдан уч баробар қимматга харид қилган. Ўша харидор Уоллис ва Эдуарднинг буюк севгиси ҳақида фильм суратга олган Мадонна эди, деган тахминлар бор.
14.23 карат оғирликдаги тўртбурчак пушти олмос Гонгконгдаги «Кристис» кимошди савдосида 23,2 миллион долларга сотилган. Табиий рангдаги пушти олмос Осиёда шу пайтгача сотилган энг қиммат тош ҳисобланади. У оқ ва пушти олтиндан ишланган узукка кўз сифатида қўйилган ва ҳар икки томондан вазни 1,67 ва 1,73 карат бўлган иккита шаффоф олмос билан безатилган.
Incomparable («Тенгсиз») номли бу маржонни Ливан заргарлик бренди Mouawad 2013 йилда ишлаб чиқарган. Унинг нархи 55 миллион долларни ташкил этади. Оғирлиги эса 637 карат. Композициянинг марказидан 407,48 каратли сарғиш-жигарранг олмос жой олган. Тош 91 та рангсиз олмос билан безатилган ва узум шодаси шаклидаги олтин ипга осилган. Афсоналарга кўра, ушбу олмосни 30 йил олдин конголик бир қиз топган.
Билагузук-соат - ҳақиқий санъат асари ва бой тасаввур маҳсули. Кичик сиферблат қимматбаҳо тошлар билан қопланган. Энг устида эса учта асосий тошлар - оқ, кўк ва қизил рангли юрак шаклидаги олмослар бор. Уларнинг умумий оғирлиги 38 карат. Бироқ, ушбу соатдаги барча тошлар 200 каратни ташкил этади. Шу каби афзалликлар билан 201 каратли Chopard дунёдаги энг қиммат соатларнинг 10 талигига кириши қийин бўлмаган.
Graff Diamond усталари 100 миллион доллар эвазига товусли тўғноғич ясаган. Тўғноғичнинг асосий қисми оқ ва ранг-баранг олмослар билан безатилган. 20.02 карат оғирликдаги ноксимон олмос жуда ҳам ноёб ҳисобланади. Товуснинг думи турли ўлчамдаги оқ ва қизил олмос тошлар билан безатилган. Патнинг ҳар бир учига оқ олмос қўйилган бўлиб, у экзотик гулнинг ғунчаси ўхшайди.
«Vittelsbah» олмоси катта (35,56 карат) мовий рангдаги олмос бўлиб, уни 1722 йилда Австриялик герсогиня Мария Амалия сарпо сифатида Vittelsbah’лар уйидан турмуш ўртоғи Карл Альбертга олиб келган. Буюк турғунлик даврида «Kristis» кимошди савдо уйи бу тарихий олмосни сотишга ҳаракат қилган. Лекин харидор топилмаган. 1964 йилдан бери у хусусий тўпламнинг таркибидан жой олган. «Vittelsbah» 2008 йил 10 декабрда «Kristis» кимошди савдосида рекорд нарх — 16,393,250 фунт стерлинг ( 24 миллион 131 минг 190 доллар) эвазига сотилган. Харидор инглиз заргари Лоренс Графф эди.
«Hatton-Mdivani» жадеит (яшил рангли минерал) маржонлари узоқ йиллар давомида бир қанча машҳур кишиларнинг мулки бўлган. Уларнинг ичида Вулворт меросхўри Барбара Ҳаттон ва малика Нина Мдивани бор. Нина ҳатто ўлим тўшагида ётганида ҳам маржонни қарз ундириш агентларидан асраш учун яшириб қўйган. Маржоннинг ўзи 27 та зумрад жадеит шодадан ташкил топган. Маржоннинг икки учида платина, ёқут, олмос ва олтиндан қилинган қисқич бўлиб, маржон эгасининг бўйнига маҳкамлаб қўйилади.
Наполеон IIIнинг хотини Евгенияга тегишли зумрад тошли тиара 2011 йил Sotheby кимошди савдосида 11,28 миллион швейцар франки (12,76 миллион доллар) эвазига сотилган.
Умид олмоси (Hope Diamond) — 45,52 каратли зангори рангли ва ўлчами 25,60×21,78×12,00 миллиметр бўлган катта олмос. Вашингтондаги Смитсон институти табиий тарих музейи экспозициясида жойлашган.
Изоҳ (0)