Ўзбекистон Республикаси божхона постларини катта ҳажмдаги сканер қурилмалари билан жиҳозлаш лойиҳаси доирасида Хитой Халқ Республикасининг грант маблағлари ҳисобидан тақдим этилган темир йўл вагонларини сканер қилувчи инспексион-кўрик мажмуалари ёрдамида оз вақт ичида катта ҳажмли юкларни божхона кўригидан ўтказиш имкони яратилди, деб хабар берди Божхона қўмитаси ахборот хизмати.
Худди шундай инспексион-кўрик мажмуаларидан яна бирини Бухоро вилояти божхона бошқармасининг «Хўжадавлат» темир йўл божхона постига ўрнатиш ишлари ўз якунига етди. Шу муносабат билан мазкур постда инспексион-кўрик мажмуасининг тантанали очилиш маросими бўлиб ўтди.
Унда Бухоро вилояти ҳокими Ўктам Барноев ҳамда Давлат божхона қўмитаси раиси Муротжон Азимов ҳамда Nuctech Co LTD компанияси вакили Чанг Зунг Чоулар иштирок этишди. Улар божхона органларида юз бераётган ижобий ўзгаришларни эътироф этиш асносида тадбир иштирокчиларини мажмуа иш бошлаганлиги билан самимий қутлади.
Тадбирнинг расмий очилиш маросимидан сўнг, йиғилганлар инспексион-кўрик мажмуаси билан яқиндан танишиб, унинг имкониятлари, иш самарадорлиги бўйича кўплаб маълумотларга эга бўлди.
Таъкидлаб ўтиш жоизки, мазкур техника ёрдамида катта ҳажмли транспорт воситалари ёки контейнерлар ичидаги товарларнинг жойлашган шаклини кўриш имкони мавжуд. У орқали контейнердаги товарларнинг декларацияда кўрсатилганлигига мослиги, контрабанда предметлари бор-йўқлигини назорат қилиш мумкин.
Изоҳ (0)