Бухоро вилоятининг Ромитан тумани ҳуқуқни муҳофаза қилиш идоралари томонидан олиб борилган профилактик тадбир давомида ноқонуний қурол эгаси аниқланди. Бу ҳақда Бухоро вилояти ИИБ матбуот хизматига таяниб, журналист Лайло Ҳайитова маълум қилди.
Ромитан туманидаги «Зарафшон» маҳалласида яшовчи 1975 йилда туғилган фуқаро Ислом Ҳамидов (исми-шарифи ўзгартирилган)нинг узоқ йиллар давомида яширин равишда ўқотар қуролни тегишли рухсатномасиз қонунга хилоф равишда сақлаб келгани аниқланди. Унинг яшаш хонадони омборхонасидан 1934 йилда «Ижевск» қурол заводида ишлаб чиқарилган 1 нилли, 16 калибрли «Иж-5» моделли, 10983-рақамли ўқотар ов қуроли топилган.
«Жиноят кодексининг 248-моддасига кўра, тегишли рухсатномасиз ўқотар қурол, шунингдек, ўқ-дори, портловчи модда ёки портлатиш қурилмаси тайёрлаш, олиш, олиб юриш, сақлаш, олиб ўтиш ёки жўнатиш жиноий жавобгарликка сабаб бўлади. Аҳоли билан ўтказилаётган тадбирларда бу кенг тушунтирилишига қарамай, Ислом Ҳамидов ўқотар қуролни ҳуқуқни муҳофаза қилиш идораларига топширмаган. Бунинг учун у жавобгарликдан озод қилинмайди», — деди Ромитан тумани ИИБ Терроризм ва экстремизмга қарши кураш бўлими тезкор вакили Раҳим Ғаниев.
Фуқаро Ислом Ҳамидовга нисбатан Жиноят кодексининг 248-моддаси 1-қисми билан қўзғатилган жиноят иши бўйича тергов ҳаракатлари олиб борилмоқда. Ушбу модда бўйича энг енгил жазо энг кам иш ҳақининг 50 баравари миқдоридаги жарима, энг оғири 5 йилгача озодликдан маҳрум қилиш ҳисобланади.
Изоҳ (0)