Buxoro viloyatining Romitan tumani huquqni muhofaza qilish idoralari tomonidan olib borilgan profilaktik tadbir davomida noqonuniy qurol egasi aniqlandi. Bu haqda Buxoro viloyati IIB matbuot xizmatiga tayanib, jurnalist Laylo Hayitova ma’lum qildi.
Romitan tumanidagi “Zarafshon” mahallasida yashovchi 1975-yilda tug‘ilgan fuqaro Islom Hamidov (ismi-sharifi o‘zgartirilgan)ning uzoq yillar davomida yashirin ravishda o‘qotar qurolni tegishli ruxsatnomasiz qonunga xilof ravishda saqlab kelgani aniqlandi. Uning yashash xonadoni omborxonasidan 1934-yilda “Ijevsk” qurol zavodida ishlab chiqarilgan 1 nilli, 16 kalibrli “Ij-5” modelli, 10983-raqamli o‘qotar ov quroli topilgan.
“Jinoyat kodeksining 248-moddasiga ko‘ra, tegishli ruxsatnomasiz o‘qotar qurol, shuningdek, o‘q-dori, portlovchi modda yoki portlatish qurilmasi tayyorlash, olish, olib yurish, saqlash, olib o‘tish yoki jo‘natish jinoiy javobgarlikka sabab bo‘ladi. Aholi bilan o‘tkazilayotgan tadbirlarda bu keng tushuntirilishiga qaramay, Islom Hamidov o‘qotar qurolni huquqni muhofaza qilish idoralariga topshirmagan. Buning uchun u javobgarlikdan ozod qilinmaydi”, — dedi Romitan tumani IIB Terrorizm va ekstremizmga qarshi kurash bo‘limi tezkor vakili Rahim G‘aniyev.
Fuqaro Islom Hamidovga nisbatan Jinoyat kodeksining 248-moddasi 1-qismi bilan qo‘zg‘atilgan jinoyat ishi bo‘yicha tergov harakatlari olib borilmoqda. Ushbu modda bo‘yicha eng yengil jazo eng kam ish haqining 50 baravari miqdoridagi jarima, eng og‘iri 5 yilgacha ozodlikdan mahrum qilish hisoblanadi.
Izoh (0)