«Ўзбекистон темир йўллари» АЖ Россиянинг «Метровагонмаш» АЖдан Тошкент метрополитени учун қиймати 27,7 миллион евро бўлган бешта таркиб сотиб олмоқчи. Бу ҳақда «Sputnik» хабар берди.
15 январь куни бу ҳақда Ўзбекистон президенти Шавкат Мирзиёевнинг қарори лойиҳаси Қонун ҳужжатлари таъсирини баҳолаш тизими порталида эълон қилинган.
«Ўзбекистон темир йўллари» «Метровагонмаш» билан ўтказган музокаралари натижасида тўрт вагонли бешта таркиб сотиб олишга келишган. Таркиб 2021 йилда қурилиши якунланадиган ерусти метро йўналиши учун харид қилинади.
Қиймати 27,7 миллион евро бўлган шартноманинг 22,14 миллион евроси Россиянинг тараққиёт ва ташқи иқтисодий фаолият банки кредити ҳисобига ҳамда 5,54 миллион евроси Ўзбекистон тикланиш ва тараққиёт Жамғармаси ҳисобига молиялаштирилади.
Айни дамда Тошкент метрополитенининг узунлиги 36,1 километрни ташкил қилиб, 29 станцияни ўз ичига олади. Ҳар куни Тошкент метрополитени хизматидан 200 мингдан ортиқ киши фойдаланади. 2022 йилда компания умумий қиймати 300 миллион АҚШ долларни ташкил қиладиган узунлиги 2,7 километр бўлган учинчи ерости ҳамда 7,1 километр бўлган ерусти метро йўли қурилишини якунлашни режалаштирган.
Изоҳ (0)