Самарқанддаги «Ёшлар маркази»да Марказий ҳарбий округ, Самарқанд вилоят ҳокимлиги, Ўзбекистон ёшлар иттифоқи Самарқанд вилоят Кенгаши билан ҳамкорликда «Мен ҳарбий бўламан» шиори остида расмлар танлови бўлиб ўтди. Бу ҳақда Мудофаа вазирлиги матбуот хизмати «Дарё»га маълум қилди.
Унда Ёшлар иттифоқи марказий Кенгаши раиси ўринбосари Алишер Саъдуллаев, Марказий ҳарбий округ қўмондонлиги ҳамда ўқувчи ёшлар иштирок этди.
Танловда юрт тинчлиги йўлида хизмат қилаётган мард ва жасур ўғлонлар ҳаёти, чегара қўшинларида хизмат вазифасини ўтаётган аскарлар, масъулиятли соҳа акс этган расмлар намойиш этилди. Ёш рассомлар ижодини кўрсатиб берган мазкур танлов Ватанга бўлган муҳаббат, садоқат, жасорат, фахр ва ифтихор туйғуларини теран англаш имконини берди.
Шунингдек, танловда буюк саркарда, соҳибқирон Амир Темурнинг шонли ҳарбий юришлари ғурур ва қатъият мужассам бўлган суратларда акс эттирилди.
Танлов натижаларига кўра, «Менинг армиям – менинг фахрим» йўналиши бўйича 1-ўрин Азиза Эсоновага насиб этди. «Мен ҳам ҳарбий бўламан» йўналишида 1-ўринни Дониёр Болтаев қўлга киритди. «Соҳибқирон Амир Темур портрети» йўналиши бўйича эса 1-ўринга Санжар Исматов муносиб деб топилди.
Ғолиблар диплом ва қимматбаҳо совғалар билан тақдирланди.
Изоҳ (0)