Президент Олий Мажлисга тақдим этган мурожаатномасида Оролни қутқариш, унинг қуриган ҳудудида ўрмонзорлар барпо этиш, жумладан, 2019 йилда 500 минг гектарлик ўрмон яратиш масаласига алоҳида эътибор қаратганди. Бу ҳақда «Зарафшон» хабар бермоқда.
Янги йил арафасида ушбу ишга қизғин киришилди. Бу ерда Қорақалпоғистон ва республиканинг барча вилоятларидан қишлоқ хўжалиги ходимлари, ўрмончи, селексионер, механизатор, ҳарбий хизматчи ва фавқулодда вазиятлар идоралари ходимларидан иборат минглаб мутахассислар саксовул экиш ишларини бошлаб юборди. Жумладан, Самарқанд вилоятидан техникалар, 40 нафарга яқин мутахассис ва механизатор жалб этилиб, айни кунларда улар бу эзгу ишга камарбаста бўлмоқда.
— «Самарқанд вилоят aгросервис МТП» масъулияти чекланган жамиятига қарашли 25 та юқори унумли техника ва 28 нафар тажрибали механизатор билан ўрмонзор барпо этиш учун ер тайёрлаяпмиз, — дейди жамоа бошлиғи, «Пахтачи туман agrosэрвис МТП» раиси Акмал Раҳматов. — Механизаторларимиз учун барча шароитлар яратилган. Шунга яраша иш унуми юқори. Асосан саксовул экиш учун ўқариқлар оляпмиз. Бор куч ва имкониятларимизни ишга солиб, Оролбўйидаги экологик вазиятни яхшилашга ўз ҳиссамизни қўшамиз».
Бу ерда вилоятдан тажрибали ўрмончилар ва вилоят фавқулодда вазиятлар бошқармасининг 6 нафар мутахассиси ҳам хайрли ишни амалга оширишда астойдил хизмат қилмоқда.
Улар Янги 2019 йилни дала бошида — махсус кўчма казармада кутиб олди. Байрамона ташкил этилган тадбирда илғорларга совғалар улашилди, қорақалпоғистонлик санъаткорлар ижросида дилтортар қўшиқлар куйланди.
Изоҳ (0)