Ички ишлар, Мудофаа вазирликлари ва Миллий гвардия кенг жамоатчилик билан ҳамкорликда тун-у кун 24 соат давомида жиноят ва ҳуқуқбузарликларнинг олдини олишга жалб қилинади. Янгилик бўлган ушбу тажриба Қорақалпоғистондан бошланмоқда. Бу ҳақда ЎзА хабар берди.
Ўзбекистон президенти Конституция қабул қилинганининг 26 йиллигига бағишланган тантанали маросимдаги маърузасида ҳуқуқбузарлик ва жиноятчиликка қарши курашишда мутлақо янгича тизим жорий этилишини маълум қилган эди.Президент Шавкат Мирзиёевнинг 2018 йил 4 декабрдаги Қорақалпоғистон Республикасида жамоат тартибини сақлаш ва ҳуқуқбузарлик профилактикаси тизими самарадорлигини ошириш бўйича чора-тадбирлар тўғрисидаги фармойишда мазкур тизим тўғрисида батафсил баён этилган.
Ушбу ҳужжат ижроси доирасида Қорақалпоғистон Республикасида амалга ошириладиган ишлар юзасидан ҳамкорликдаги «Йўл харитаси» ишлаб чиқилди. Унда ички ишлар органлари ходимларининг ватанпарварлик ва маънавий тарбияси самарадорлигини янада ошириш, мамлакат тинчлиги ва осойишталигини таъминлаш борасида вазифаларни ҳал этишда уларнинг ҳарбий бўлинмалари билан узвий ҳамкорлигини ташкил қилиш, шунингдек, уларда жамоавийликни, уюшқоқлик ва дахлдорлик туйғуларини юксалтириш тизимини такомиллаштириш мақсад қилинган.
Шундан келиб чиқиб, Шимоли—Ғарбий ҳарбий округ базасида ихтисослаштирилган ўқув-амалий курслари ташкил этиш белгиланган. Ички ишлар идоралари ходимларидан иборат гуруҳлар белгиланган кун тартиби асосида назарий ва амалий машғулотларда қатнашиб, куннинг иккинчи ярмида «Хавфсиз шаҳар» концепцияси тадбирлари доирасида жиноят содир этилиш хавфи юқори бўлган ҳудудларда жамоат тартибини сақлаш учун жалб қилинади.
Бугунги кунда ходимларнинг ўқиши, машғулотларга қатнаши ва дам олиши учун зарур шароит яратиш ишлари бошлаб юборилган.
Изоҳ (0)