Тошкент вилояти «Оила» бошқармаси ташаббуси билан Паркент туманида 120 нафар ёшлар махсус ўқув курсини тамомлади, деб ёзади ЎзА.
Дилором Maxамадалиева – Тошкент вилояти «Оила» илмий-амалий тадқиқот бошқармаси бошлиғи:— Бугунги кунда Тошкент вилояти ҳудудида 2 миллион 910 минг 351 нафар аҳоли истиқомат қилаётган бўлса, оилалар сони 788 280 тани ташкил этмоқда. Вилоятда «Оила» илмий-амалий тадқиқот бошқармаси томонидан оилавий ажримларни камайтириш борасида илмий-амалий тадқиқотлар олиб борилмоқда. Таҳлиллар шуни кўрсатмоқдаки, ажримлар нафақат ёш оилаларда, балки 3-4 нафар фарзанди бор оилаларда ҳам кузатиляпти. Бунга турли омиллар, чунончи, эр-хотин ва қайнона-келин ўртасидаги муносабатлар, ишсизлик масаласи, иқтисодий етишмовчилик, ноқобил фарзандлар ва уларнинг соғлиги ҳамда ўқиш фаолиятлари билан боғлиқ ҳаётий муаммолар сабаб бўлаётган экан. Вилоятда жорий йилнинг ўтган даври мобайнида 145 та нотинч оилаларнинг муаммоларига ечим топилди, ичкиликка ружу қўйиш каби иллатлар ва уруш-жанжалларга барҳам берилди, ажралиш арафасида турган 3 144 оиладан 1 492 оилани яраштиришга эришилди. Хусусан, жорий йилда «Оила» бошқармаси ташаббуси билан ўқув курслари ташкил этилиб, асосан никоҳланувчи ёшларга 20 кун давомида 16 соатлик маърузалар ўқиб эшиттирилди. Лойиҳада кўзланган асосий мақсад – ёшларга мустақил ҳаёт кўникмалари бўйича тегишли билим ва кўникмалар беришдан иборат.
Мавлуда Бердиқулова – Паркент тумани «Оила» бўлими раҳбари:— Лойиҳа сифатида бошланган ўқув курсларда оилавий қадриятлар, оила ҳуқуқи, оиланинг саломатлиги ҳақида ёшларга тегишли маълумотлар бериб ўтилди. Таъкидлаш жоиз, қисқа вақт давомида мазкур ўқув курсларидаги машғулотлардан сўнг оила қурган ёшлар жамиятда ўз ўринларига эга бўлгани, ота-онага ҳурмат, ўзаро муомала маданияти, рўзғор юмушлари бўйича тўлақонли билимга эга эканликлари боис янги ҳаётида ҳеч бир қийинчиликка дуч келмай бахтли ҳаёт кечираётганликлари кузатилди.
Обиджон Собитов — Паркент тумани Хисорак қишлоғи, Улубек маҳалласи:— Дилрабо Хурсанова билан турмуш қуриш ниятида туман ФҲДЁга ариза берганимизда бизга никоҳдан ўтувчиларнинг ўн кунлик ўқув машғулотлари борлигини айтишди. Очиғи, олдинига бу янгилик менга эриш туюлди. Қандай ўқиш экан, унинг бизга нима кераги бор, деб ўйладим. Ноилож рози бўлдик. Машғулотлар давомида биз оила, унда эр-хотиннинг ўрни, бурчи ва вазифалари, муомала маданияти, қайнона-келин муносабатлари, ҳақ-ҳуқуқларимиз ҳақида билим олдик. Буларнинг барчаси бизга янги ҳаёт остонасида доимо қўл келади ва тинч-осойишта яшаб, меҳнат қилишимизга яқиндан ёрдам беради.
Изоҳ (0)