Сурхондарёда никоҳни бекор қилиш ҳақидаги аризалар ўтган йилгидан 401 тага кўпайди

Сурхондарё вилоятида 2018 йилнинг 10 ойи давомида никоҳдан ажратиш ҳақидаги аризалар сони 2017 йилнинг шу давридаги кўрсаткичга нисбатан 401 тага кўпайди. Бу ҳақда фуқаролик ишлари бўйича вилоят суди раиси Лутфулла Қудратов маълум қилди, дея хабар беради «Turon 24».

2017 йилнинг январь октябрь ойларида судларга никоҳдан ажратиш билан боғлиқ 3233 та ариза тушган бўлса, 2018 йилнинг шу даврида 3634 та ариза топширилган.

«Оила» илмий-амалий тадқиқот маркази Денов туман бўлими бошлиғи Шарифа Илиеванинг айтишича, ажримларнинг 72 фоизига оилавий муносабатларга учинчи шахснинг аралашуви сабаб бўлмоқда. Никоҳ бузилиши сўралган аризалар ўзаро келишмовчилик, иқтисодий етишмовчилик туфайли кўпаймоқда.

Вилоятдаги «Оила» маркази томонидан ажрим ёқасидаги 571 та оиланинг рўйхати шакллантирилган. Унга кўра, 189 та ҳолатда эр-хотиннинг ўзаро келишмовчилиги, 188 та ҳолатда учинчи шахснинг оилавий муносабатларга аралашуви, 50 та ҳолатда фарзандсизлик, 20 ҳолатда хиёнат, 18 ҳолатда моддий таъминот ва ишсизлик, 30 ҳолатда ичкиликка ружу қўйиш, 9 ҳолатда миграция, 21 ҳолатда уй-жой танқислиги туфайли эр-хотинлар ажрашишга уринган.