Тошкентнинг «Локомотив» клуби ҳужумчиси Марат Бикмаев Ўзбекистон Pepsi Суперлигасининг 31-туридан ўрин олган «Пахтакор»га қарши баҳс вақтида одоб-аҳлоқ қоидаларига мос келмайдиган хатти-ҳаракатни амалга оширгани учун 2 та ўйинга дисквалификация қилиниб, 20 миллион сўм жаримага тортилди. Бу ҳақда ПФЛ расмий сайтида хабар берилди.
ПФЛ Этика қўмитаси юзага келган вазиятни атрофлича ўрганган ҳолда Мусобақалар регламентининг интизомий ва жарималар кодекси 3-бўлим, 5.45 бандининг «Г» қисмини қўпол равишда бузгани эътироф этилган Марат Бикмаевнинг 31-тур ўйини вақтида ва унгача бўлган 23-тур учрашуви пайтида ҳам одоб-ахлоқ қоидаларидан четга чиққанини инобатга олган ҳолда мазкур қарорга келган.
Turon24’нинг ёзишича, дисквалификация муддати Ўзбекистон чемпионати ва кубоги доирасидаги учрашувларда амал қилади. Жарима пули эса бир ой давомида тўлаб берилиши керак.
Маълумот учун, Марат Бикмаев 26 ноябрь куни бўлиб ўтган Пахтакорга қарши учрашувда гол нишонлаш чоғида бармоқлари ёрдамида рақиб жамоа мухлислари томонга номақбул хатти-ҳаракатни амалга оширганди.
Изоҳ (0)