20 ноябрь куни Германиянинг Берлин техника университети профессори ва университет қошидаги ESM-Spase Technologies GmbH компанияси ижрочи директори – Арнольд Штеренгарс ҳамда Берлин техника университети илмий ходими – Дмитрий Осторверхов Ислом Каримов номидаги Тошкент давлат техника университетига ташриф буюрди, деб хабар берди университет матбуот хизмати.
Меҳмонлар университет ректори Садриддин Туробжонов билан билан учрашди. Учрашувда ҳар икки университет ходимлари ўз олий таълим муассасалари ҳақида маълумотларни йиғилганларга тақдим этди.
Музокара давомида Германия таълим тизимининг ижобий жиҳатлари қайд этилиб, икки томонлама самарали ҳамкорлик ва биргаликда илмий изланишлар олиб бориш, ундаги илғор тажрибаларни Ўзбекистон олий таълимида жорий этиш, коинот сарҳадларини забт этишда Ўзбекистонлик талабаларни ҳам жалб этиш, фазога Тошкент давлат техника университети талабалари билан бирга тайёрланган синов-микро йўлдошини учириш, дастурлаш, конструкторлик ишлари ва тадқиқотлари, метрология йўналишларида изланишлар ва тадқиқотлар олиб бориш, семинар ва конференциялар ташкил этиш ҳамда талабалар алмашинуви каби долзарб масалаларни муҳокама қилди.
Шу куннинг ўзида Германиялик мутахассислар университетнинг «Метрология, стандартлаштириш ва сертификатлаштириш» кафедраси профессор-ўқитувчилари билан учрашув ҳамда«Таълим тизимининг сифат истиқболлари» ва «Индустрия 4» мавзусида мастер класслар ўтказди ҳамда соҳага оид тажрибалари билан ўртоқлашди.
Жорий йилнинг 23 ноябрь куни эса профессор Арнольд Штеренгарс иштирокида университетнинг «Муҳандислик технологиялари» факультетида «Берлин техника университетида талабалар инновацион ғояларини амалиётга жорий этиш тажрибаси» мавзусида Мастер класс ташкил этилди. Мастер классда факультетнинг «5620200-Ҳаводаги ҳаракатни бошқариш» ва «5310400-Ҳаво кемаларидан техник фойдаланиш» таълим йўналишларининг 50 нафар талабалари, ҳамда университет қошидаги тармоқ малака ошириш марказининг 30 нафар тингловчилари иштирок этди. Берлин техника университети жаҳон олий таълим муассасалари рейтингида биринчи 100 талик қаторидан жой олган бўлиб, учрашув давомида профессор Арнольд Штеренгарс талабларга университетда олиб борилаётган таълим тизими ва ҳозирги кунда жадал ривожланаётган космик тадқиқотлар ва мини сунъий йўлдошлар технологиялари соҳалари ҳақида маълумотлар бериб ўтди. Шунингдек, Берлин техника университети қошида ташкил этилган ESM-Spase Technologies GmbH компаниясининг айнан талабалар томонидан яратилаётган инновацион ишланмаларни амалиётга жорий қилишда муҳим бўғин эканлиги ва унинг функцияси ҳақида ҳам атрофлича маълумотлар бериб ўтилди. Учрашувда талабалар Берлин техника университетида таҳсил олиш шартлари ва таълимга оид бошқа саволларга атрофлича жавоб олди.
Шуни қайд этиш жоизки, шу йилнинг сентябрь ойида Тошкент давлат техника университети ва Берлин техника университети ўртасида ўзаро ҳамкорлик меморандуми имзоланган эди.
Изоҳ (0)