20-noyabr kuni Germaniyaning Berlin texnika universiteti professori va universitet qoshidagi ESM-Spase Technologies GmbH kompaniyasi ijrochi direktori – Arnold Shterengars hamda Berlin texnika universiteti ilmiy xodimi – Dmitriy Ostorverxov Islom Karimov nomidagi Toshkent davlat texnika universitetiga tashrif buyurdi, deb xabar berdi universitet matbuot xizmati.
Mehmonlar universitet rektori Sadriddin Turobjonov bilan bilan uchrashdi. Uchrashuvda har ikki universitet xodimlari o‘z oliy ta’lim muassasalari haqida ma’lumotlarni yig‘ilganlarga taqdim etdi.
Muzokara davomida Germaniya ta’lim tizimining ijobiy jihatlari qayd etilib, ikki tomonlama samarali hamkorlik va birgalikda ilmiy izlanishlar olib borish, undagi ilg‘or tajribalarni O‘zbekiston oliy ta’limida joriy etish, koinot sarhadlarini zabt etishda O‘zbekistonlik talabalarni ham jalb etish, fazoga Toshkent davlat texnika universiteti talabalari bilan birga tayyorlangan sinov-mikro yo‘ldoshini uchirish, dasturlash, konstruktorlik ishlari va tadqiqotlari, metrologiya yo‘nalishlarida izlanishlar va tadqiqotlar olib borish, seminar va konferensiyalar tashkil etish hamda talabalar almashinuvi kabi dolzarb masalalarni muhokama qildi.
Shu kunning o‘zida Germaniyalik mutaxassislar universitetning “Metrologiya, standartlashtirish va sertifikatlashtirish” kafedrasi professor-o‘qituvchilari bilan uchrashuv hamda“Ta’lim tizimining sifat istiqbollari” va “Industriya 4” mavzusida master klasslar o‘tkazdi hamda sohaga oid tajribalari bilan o‘rtoqlashdi.
Joriy yilning 23-noyabr kuni esa professor Arnold Shterengars ishtirokida universitetning “Muhandislik texnologiyalari” fakultetida “Berlin texnika universitetida talabalar innovatsion g‘oyalarini amaliyotga joriy etish tajribasi” mavzusida Master klass tashkil etildi. Master klassda fakultetning “5620200-Havodagi harakatni boshqarish” va “5310400-Havo kemalaridan texnik foydalanish” ta’lim yo‘nalishlarining 50 nafar talabalari, hamda universitet qoshidagi tarmoq malaka oshirish markazining 30 nafar tinglovchilari ishtirok etdi. Berlin texnika universiteti jahon oliy ta’lim muassasalari reytingida birinchi 100 talik qatoridan joy olgan bo‘lib, uchrashuv davomida professor Arnold Shterengars talablarga universitetda olib borilayotgan ta’lim tizimi va hozirgi kunda jadal rivojlanayotgan kosmik tadqiqotlar va mini sun’iy yo‘ldoshlar texnologiyalari sohalari haqida ma’lumotlar berib o‘tdi. Shuningdek, Berlin texnika universiteti qoshida tashkil etilgan ESM-Spase Technologies GmbH kompaniyasining aynan talabalar tomonidan yaratilayotgan innovatsion ishlanmalarni amaliyotga joriy qilishda muhim bo‘g‘in ekanligi va uning funksiyasi haqida ham atroflicha ma’lumotlar berib o‘tildi. Uchrashuvda talabalar Berlin texnika universitetida tahsil olish shartlari va ta’limga oid boshqa savollarga atroflicha javob oldi.
Shuni qayd etish joizki, shu yilning sentabr oyida Toshkent davlat texnika universiteti va Berlin texnika universiteti o‘rtasida o‘zaro hamkorlik memorandumi imzolangan edi.
Izoh (0)