Бандлик ва меҳнат муносабатлари вазирлиги хусусий бандлик агентликларини рўйхатга олиш ва фуқароларни хорижда ишга жойлаштириш учун лицензия беришни бошлади, деб хабар берди Меҳнат вазирлиги ахборот хизмати.
Ўзбекистон Республикаси Бандлик ва меҳнат муносабатлари вазирлиги https://reestr.mehnat.uz сайтини ишга туширди. Сайт орқали онлайн тартибда 2 хил турдаги хизматдан фойдаланиш мумкин: хусусий бандлик агентликлари реестри ва Ўзбекистон фуқароларини хорижда ишга жойлаштириш бўйича фаолият юритиш учун лицензия олишга ҳужжатлар ҳавола этиш.
2018 йил 17 октябрь Президент «Хусусий бандлик агентликлари тўғрисида»ги Қонунни имзолади. Ушбу ҳужжат туфайли Ўзбекистон фуқароларини хорижда ишга жойлаштириш бўйича давлат монополияси тугатилди. Эндиликда мазкур фаолият тури билан хусусий ташкилотлар ҳам шуғулланиши мумкин.
Қонунда, шунингдек, фуқароларни Ўзбекистон ҳудудида ёки ташқарисида ишга жойлаштириш бўйича амалга ошириладиган ҳар қандай фаолият учун хусусий бандлик агентликларини рўйхатдан ўтказиш ва https://reestr.mehnat.uz сайти орқали реестрга киритиш зарурлиги назарда тутилган. Таъкидлаш жоизки, хусусий бандлик агентликлари номланишида «Хусусий бандлик агентлиги» сўзлари бўлиши керак.
Агарда хусусий бандлик агентликлари Ўзбекистон фуқароларини хорижда ишга жойлаштириш фаолияти билан шуғулланадиган бўлса, худди шу https://reestr.mehnat.uz сайти орқали лицензия олиши, лицензия олиш учун ҳужжатларни топшириши зарур.
Лицензия олиш шартлари Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармасида 50 000 АҚШ долларини захиралаш ҳамда штатда камида икки нафар ходимнинг бўлиши каби талаблардан иборат. Хусусий бандлик агентлиги устав фондининг энг кам миқдори белгиланмаган.
Қонуннинг қабул қилиниши ишга жойлаштириш, шу жумладан, меҳнат миграцияси бўйича хизмат кўрсатадиган бозорни тартибга солишга, хусусий секторлар учун янги имкониятлар яратишга, шунингдек, Ўзбекистон Республикаси ҳудудида ва ташқарисида меҳнат фаолиятини амалга ошираётган фуқароларнинг ҳуқуқ ва эркинликлари ҳимоясини кучайтиришга қаратилган.
Изоҳ (0)