Ўзбекистон Республикаси Ички ишлар вазирлиги жамоатчилик ва оммавий ахборот воситалари билан алоқалар бошқармасидан маълум қилишларича, кейинги бир суткада ис газидан заҳарланиш, ёнғиндан куйиш билан боғлиқ бир неча ҳолат қайд этилган, деб ёзади ЎзА.
Бу борада огоҳликка даъват этувчи тарғибот ишларига қарамай, айрим кишилар ўз билганича иш тутмоқда. Куни кеча Сирдарё вилоятининг Янгиер шаҳрида яшовчи уй бекаси Н.Х. 14 ёшли ўғли Ш.Қ. ҳамда 12 ёшли жияни Т.Қ. билан бирга иситиш печидан сизиб чиққан ис газидан заҳарланиб, касалхонага ётқизилган.
Жиззах вилоятининг Бахмал туманида яшовчи уй бекаси Н.Г. эса ўчоқда олов ёқиш вақтида елим идишда бўлган газ конденсатидан сепган. Дераза токчасида ёниб турган шамчироққа газ конденсати сачраб тушиши оқибатида чақнаш содир бўлиб, ёнғин келиб чиққан. Натижада Н.Г. ҳамда шу пайтда уйида меҳмонда бўлган қўшнисининг ўғли 11 ёшли А.У. куйиш жароҳатлари олиб, касалхонага ётқизилган.
Қашқадарё вилоятининг Яккабоғ туманида яшовчи уй бекаси М.Р. уйида истиш печига кўмир ёқиб, назоратсиз қолдириши оқибатида кўмир исидан заҳарланиб касалхонага ётқизилган.
Хоразм вилоятининг Урганч шаҳрида яшовчи пенсионер М.А. ҳаммомдаги иситиш печини ёқиш мақсадида гугурт чаққан вақтида печдан сизиб чиқиб тўпланиб қолган газ ва ҳаво аралашмасидан чақнаш содир бўлган. Оқибатда у куйиш жароҳатлари билан касалхонага ётқизилган.
Навоий вилоятининг Кармана туманида яшовчи Н.Т. нинг қурилиши тугалланмаган уйида ёнғин содир бўлган. Кўрилган чоралар натижасида ёнғин ўчирилган. Бироқ, ёнғин оқибатида уйнинг 9 квадрат метр майдони, шифт қисми ёниб зарар кўрган. Ёнғин ўчириш вақтида шу уйда ёлланиб ишлаётган А.Б куйиш жароҳатлари билан касалхонага ётқизилган. Маълум бўлишича, ёнғин А.Б. маст ҳолда сигарета чекиб ухлаб қолиши оқибатида келиб чиққан.
Содир бўлган барча ҳолатлар юзасидан суриштирув ишлари олиб борилмоқда.
Изоҳ (0)