Қорақалпоғистон Республикасида хотин-қизларни ижтимоий қўллаб-қувватлашга доир бир қатор тадбирлар бўлиб ўтди, деб хабар берди Хотин-қизлар қўмитаси матбуот хизмати.
Шулардан асосийси Тахиатош шаҳрида Хотин-қизлар қўмитаси томонидан 11 нафар аёлга уйларнинг калитлари топширилиши бўлди.
Айтиш жоизки, 2018 йилнинг ўтган даври мобайнида Қорақалпоғистон Республикасида 303 нафар аёл уйли бўлди. Шундан Хотин-қизлар қўмитаси қошидаги Хотин-қизларни ва оилани қўллаб-қувватлаш жамоат Фонди томонидан ногиронлиги бўлган ва оғир ижтимоий аҳволга тушиб қолган 128 нафар аёлга 5 миллиард 22 миллион сўм миқдорида уй олиш учун дастлабки бадал пуллари тўлаб берилди.
Шунингдек, Ўзбекистон хотин-қизлар қўмитаси ташаббуси билан Қорақалпоғистон Республикасининг турли ҳудудларида 87 та цех ташкил қилинди, 446 нафар аёл иш билан таъминланди.
Куни кеча ана шундай цехлардан 2 таси Амударё ва Беруний туманларида иш бошлади.
Ўзбекистон хотин-қизлар қўмитаси аёллар бандлигини таъминлаш ва улар орасида тадбиркорликни ривожлантириш бўйича ўз ишини давом эттиради.
Айтиш жоизки, йил бошидан буён Қорақалпоғистон Республикасида 20 мингга яқин ишсиз аёл аниқланган эди. Улардан 18 минг 184 нафар аёллар иш билан таъминланди.
Қорақалпоғистоннинг бир қатор туманларида Қўмита томонидан аёллар учун маънавий-маданий тадбир ташкил қилиниб, унинг доирасида кам таъминланган, эҳтиёжманд, ногиронлиги бўлган аёлларга маиший техника воситалари - музлатгич, кир ювиш машинаси, газ плитаси, духовкалар, тикув машиналари топширилди.
Ўзбекистон иқтисодиётида аёллар тадбиркорлиги улушини ошириш, хотин-қизларга оилавий ва хусусий тадбиркорликни ташкил этишга кўмаклашиш мақсадида Хотин-қизлар ва оилани қўллаб-қувватлаш жамоат Фонди томонидан 2018 йилнинг ўтган даври мобайнида Қорақалпоғистон Республикасида 3,2 миллиард сўм ажратилди.
Кредит маблағлари йиллик 7 фоиз шарт билан аёллар тадбиркорлигини бошлаш ёки ривожлантириш мақсадида тақдим этилди.
2019 йилда ажратиладиган кредит маблағлар ҳажмини 2 баробарга ошириш кўзда тутилган.
Изоҳ (0)