Ўзбекистон Бандлик ва меҳнат муносабатлари вазирлиги ОАВларда хусусий киракашлик, кунбай ҳақ тўланадиган ишлар ва хусусий ёлланиб ишлайдиган таъмирлаш-қурилиш ишлари каби фаолият турлари учун патент киритилиши режалаштирилаётгани ҳақида пайдо бўлган хабарлар ҳақиқатга тўғри келмаслигини маълум қилди.
«Меҳнат фаолиятининг кўрсатилган турлари учун патент киритилиши қонунчилик ташаббуси эмас ва ҳеч бир расмий ҳужжатга киритилмаган. Айни пайтда ушбу масала Бандлик ва меҳнат муносабатлари вазирлиги доирасида муҳокама қилиш ва ўрганиш босқичида», — дейилади хабарда.
Ўзбекистонда меҳнат бозоридаги асосий муаммолардан бири бу норасмий секторда бандлик даражаси катталигидир, бунда барча ишловчиларнинг 56 фоизи жамланган, дейилади баёнотда.
Таъкидланишича, айнан шу ҳолат қатор салбий оқибатларга олиб келмоқда — давлат бюджетига солиқ тўловлари келиб тушмаяпти ва бу ҳолат истиқболда пенсия тизимига ҳам ўз «юкини» туширмоқда.
Бунда бир йиллик фаолият учун энг кам иш ҳақининг 4,5 баравари миқдорида патент тўловини амалга ошириш керак бўлади.
«Бундай турдаги патентни олиш фақат кўнгилли равишда амалга оширилган. Яъни патентни кўнгилли равишда олиб ва йилига 912 285 сўм (ойига 76 023 сўм) тўлаб, фуқаро меҳнат стажининг тўлиқ меҳнат фаолияти сифатида ҳисобланилишига эришар эди. Бундай чора умумий пенсия тизими шакллантиришга қўшимча сондаги фуқароларни жалб қилиш имконини берарди ва кейинчалик ушбу фуқароларнинг ёш бўйича пенсия олишини таъминларди», — дея аниқлик киритди вазирлик.
Изоҳ (0)