Ўзбекистон Миллий матбуот марказида Ҳадис илми мактаби ташкил этилиши тафсилотларига бағишланган брифинг ўтказилди. Бу ҳақда ЎзА хабар берди.
Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита томонидан ташкил этилган тадбирда Ўзбекистон Президентининг 2018 йил 16 апрелдаги «Диний-маърифий соҳа фаолиятини тубдан такомиллаштириш чора-тадбирлари тўғрисида»ги фармони ҳамда Ўзбекистон Республикаси Вазирлар Маҳкамасининг 2018 йил 1 ноябрдаги «Ҳадис илми мактаби фаолиятини ташкил этиш ва қўллаб-қувватлаш чора-тадбирлари тўғрисида»ги қарори ижроси билан Ўзбекистон мусулмонлари идораси муассислигидаги Ҳадис илми мактаби хусусида маълумот берилди.
Жумладан, мазкур таълим даргоҳи битирувчиларига бериладиган давлат намунасидаги диплом Ўзбекистон Республикасида олий диний таълим соҳасидаги бакалавр даражасини берувчи олий маълумот тўғрисидаги ҳужжат, деб эътироф этилади. Мактабда «Ҳадисшунослик» таълим йўналиши бўйича бакалавр кадрлар тайёрланади. Ўқиш муддати 5 йил бўлиб, кундузги таълим шаклида олиб борилади. Мактабга араб тилини пухта ўзлаштирган, ҳадисларни ёд олишга салоҳиятли бўлган ўрта махсус диний таълим муассасаларининг иқтидорли битирувчиларидан саралаб олинади.
Ҳадис илми мактабида Қуръон, ҳадис, фиқҳ ва ақида илми, араб тили, Ислом тарихи, аниқ ва табиий, ижтимоий-гуманитар фанлар ҳамда хорижий тиллардан ёшларга сабоқ берилади. Ушбу мактабни шакллантиришда Миср Араб Республикасидаги Ал-Азҳар университети, Мавританиядаги Ҳадис илми мутахассисларини тайёрлаш маркази, Туркиядаги Мармара давлат университети, Покистондаги Дорул улум университети ва бошқа хорижий таълим муассасаларининг тажрибаси ўрганилди.
Ҳадис илми мактабига 2018—2019-ўқув йили учун қабул жорий йилнинг 8 ноябридан 15 ноябригача белгиланди.
Изоҳ (0)