Ўзбекистонда йўл ҳаракати қоидаларини бузганлик ҳайдовчилик гувоҳномалари олиб қўйилмайдиган бўлди

Ички ишлар вазирлигининг «Тошкент шаҳрида йўл ҳаракати қоидаларининг бузилишига доир маъмурий жарималарни тўлашнинг биллинг тизимини жорий этиш тўғрисида»ги буйруғи жорий йил 1 ноябридан кучга киради. Бу ҳақда ИИВ жамоатчилик ва ОАВ билан алоқалар бошқармаси маълум қилди.

Мазкур ҳужжатга мувофиқ айнан ушбу санадан бошлаб Тошкент шаҳрида йўл ҳаракати қоидаларининг бузилишига доир маъмурий жарималарни тўлашнинг биллинг тизими тажриба тариқасида ишга туширилади.

Шунингдек, буйруқда Ички ишлар вазирлиги томонидан республика миқёсида йўл ҳаракати соҳасидаги маъмурий ҳуқуқбузарликларга доир маълумотларнинг ягона базасини ўз ичига олган, жарималар солиш тартиботлари ва уларнинг тўланишини назорат қилинишини таъминловчи «Маъмурий амалиёт» комплекс автоматлаштирилган ахборот тизими (КААТ) амалиётга жорий этилгани ҳам қайд этилган.

Эндиликда «Маъмурий амалиёт» КААТдан фойдаланган ҳолда транспорт воситалари ҳайдовчилари томонидан йўл ҳаракати қоидаларининг бузилиши биринчи марта ёки такроран содир этилаётганлиги бўйича факт планшет телефонлар ёрдамида воқеа жойининг ўзида реал вақт режимида аниқланади.

Биллинг тизимидан фойдаланишда йўл ҳаракати қоидаларини бузганлиги учун транспорт воситалари ҳайдовчиларининг ҳайдовчилик гувоҳномалари олиб қўйилмайдиган бўлди. Маъмурий жавобгарлик тўғрисидаги кодекснинг тўғридан-тўғри транспорт воситасини бошқариш ҳуқуқидан маҳрум қилишни назарда тутувчи моддасида кўрсатилган ҳолатлар бундан мустасно.

Муҳим янгиликлардан яна бири — қоидабузарга жарима мобил алоқа операторлари орқали биллинг тизимидан фойдаланган ҳолда SMS шаклда ҳамда «Ўзбекистон почтаси» АЖ орқали юборилади.