Тошкентда кадастр тизимларини модернизациялаш бўйича семинар ўтказилади

25 октябрь Тошкент шаҳридаги Wyndham меҳмонаси мажлислар залида Жаҳон банки томонидан молиялаштирилаётган «Кўчмас мулкни рўйхатдан ўтказиш ва кадастр тизимларини модернизациялаш» (КМРЎКТМ) лойиҳаси бўйича семинар бўлиб ўтади. Бу ҳақда лойиҳа ташкилотчилари «Дарё»га хабар бермоқда.

Семинар мақсади: КМРЎКТМ вазифалари, натижалари ва ушбу лойиҳа амалга оширилишидан давлат ва фуқаролар учун кўриладиган фойда ҳақида маълумот бериш.

Семинар ташаббускори (нюсмейкери) – Ўзбекистон Республикаси Ер ресурслари, геодезия, картография ва давлат кадастри давлат қўмитаси (Давергеодезкадастр).

Биринчи бор ўтказилаётган семинар ишида ҳукумат, вазирликлар ва идоралар, маҳаллий ҳокимият органлари, жамоат ташкилотлари (Ёшлар ҳаракати, Хотин-қизлар қўмитаси, Маҳалла жамғармаси, Нуроний жамғармаси), халқаро молия институтлари (Осиё тараққиёт банки, Европа тикланиш ва тараққиёт банки, Ислом тараққиёт банки), банк сектори, суғурта компаниялари, нотариал идоралар, олий таълим муассасалари, хусусий сектор (геодезия, баҳолаш, риэлтор команаиялари, турар-жой фонди қурувчилари), «Давергеодезкадастр» қўмитаси таркибига кирувчи ташкилотлар вакиллар иштирок этадилар.

Шунингдек, семинарга маҳаллий оммавий ахборот воситаларининг вакиллари ҳам таклиф этилган.

Семинар спикерлари :

Абдушукур Абдуллаев – «Давергеодезкадастр» қўмитаси раиси

Кис Белл – Жаҳон банкининг ер сиёсати бўйича катта мутахассиси

Александр Самборский – семинар модератори, ер ҳуқуқи бўйича Лойихани амалга ошириш гурухи (ЛАОГ) мутахассиси

Ауво Финне – Compet-Terra & FGC Қўшма корхонаси, IT бўйича маслаҳатчи (Финляндия)

Ренат Загретдинов – халқаро маслаҳатчи (Россия)

Владимир Василев – Compet-Terra & FGC ҚК (Швеция)

Рустам Пайзиев – «Давергеодезкадастр» қўмитаси мутахассиси

Семинар дастурига кадастр ҳисобини юритиш ва кўчмас мулкка эгалик ҳуқуқини давлат рўйхатидан ўтказиш тизимига замонавий ахборот-коммуникация технологияларини татбиқ этиш, ахборот ресруслари ва тизимларининг жадал ривожланишини таъминлаш, давлат органлари, тадбиркорлик субъектлари ва аҳолига сифатли интерфаол давлат хизматларини тақдим этишга оид долзарб муаммолар бўйича маърузалар киритилган.