Тошкент вилояти давлат солиқ бошқармаси томонидан Тошкент туманидаги Учқаҳрамон савдо мажмуаси ҳудудида профилактик назорат тадбири ўтказилди, деб хабар беради солиқ қўмитаси матбуот хизмати.
«Ушбу тадбирда фуқаро Мамаюсуф Ашуров 11 А/Б-сонли дўконда бемалол савдо қилаётганига дуч келдик. Шу ўринда савол туғилади. На савдо фаолиятига рухсат берувчи патенти, на маҳсулотларининг ҳужжати бўлган бу шахсга савдо мажмуаси раҳбарияти томонидан Вазирлар Маҳкамасининг 2012 йил 28 августдаги 253-сонли қарорига зид равишда тадбиркорлик фаолиятини амалга ошириш учун шароит яратиб берганини қандай тушуниш мумкин?
Давлат қонунларига беписандлик билан қараш туфайли туманнинг «Чоштепа» кўчасида ҳам қонун бузилиш ҳолатларига йўл қўйилган. Шундоққина серқатнов йўл бўйида автомобиль эҳтиёт қисмлари савдосини йўлга қўйган фуқаро Одил Мухсимов давлат солиқ ходимлари томонидан расмий огоҳлантириш хати олганига қарамай, яна қонунни бузиб турса-я. Ёҳуд қонундан устунман дегувчи ўзига ишонган орқа тоғлари бормикан унинг?
Солиқлар тараққиётимиз таянчи, бунга шубҳа йўқ. Аммо солиқ тўламай, тараққиётимиз ривожига билиб-билмай болта ураётган қўштирноқ ичидаги тадбиркорлар, афсуски, учраб турибди. Назорат тадбирларида замонавий дастгоҳлар ёрдамида бежирим пояфзаллар ишлаб чиқараётган Зангиота тумани, Эшонгузар қўрғонидаги фуқаро Ваҳоб Файзиевга фаолиятини қонуний юритганида эди, унга ҳозир таҳсинлар айтаётган бўлармидик?
Солиқ хизмати ходимлари ўз фаолиятини расмийлаштирмаган 4 йигитга меҳнат стажининг пенсияга чиқишдаги афзалликлари, ‘конверт’ усулида ойлик маош олиш жиноят эканлиги ҳамда қонуний тадбиркорлик учун барча шароитлар яратиб берилгани батафсил тушунтирилди.
Профилактик назорат тадбирлари давомида Эшонгузар маҳалла йиғини ҳудудида фуқаро Шоҳсанам Одилова томонидан озиқ-овқат маҳсулотларининг ноқонуний савдоси йўлга қўйилгани ҳам маълум бўлди», — дейилади хабарда.
Изоҳ (0)