23 октябрь куни InnoWeek инновацион ҳафталик доирасида Халқаро инновацион-инвестицион форум ва халқаро инновацион кўргазма ўз ишини бошлади. Инновацион ривожланиш вазирлиги матбуот хизмат хабар берди.
Ўзбекистон Республикаси Инновацион ривожланиш вазирлиги томонидан ташкиллаштирилган ушбу тадбирнинг илк кунида БМТ Тараққиёт дастури, Англия, Италия, Исроил, Россия, Хитой, Қозоғистон корхоналари, ҳамда Ўзбекистондаги хорижий компаниялар билан англашув меморандумлари имзоланди. Мазкур битимлар Инновация лабораториялари, иккиламчи энергоресурслар, давлат ахборот тизимлари, соғликни сақлаш, робототехника, муқобил энергия каби соҳаларни ўз ичига қамраб олади.
Жумладан, БМТ Тараққиёт дастури билан имзоланган ҳужжат давлат бошқаруви масалаларини режалаштириш, амалга ошириш ва мониторинг қилиш жараёнлари самарадорлигини оширишга давлат хизматчилари малакасининг ошишига хизмат қилувчи инновацион ёндошувларни ўрганиш, синовдан ўтказиш ва жорий этишга қаратилган. Шунингдек давлат хизматларининг фуқаролар ва тадбиркорлар учун сифатини яхшилашга ва имкониятларини кенгайтиришга хизмат қилиши кутилмоқда.
Қозоғистон «Казроботикс» Таълим ва спорт робототехника федерацияси билан имзоланган англашув меморандумининг мақсади таълим робототехникаси соҳасида ҳамкорлик, илмий-амалий конференциялар, семинарлар, давра суҳбатлари ва таълим робототехникасига бағишланган бошқа тадбирларни ташкил этиш ва уларда иштирок этиш, мазкур соҳага оид амалдаги қонунчиликни такомиллаштириш бўйича таклифларни таҳлил қилиш ва уларни киритиш, шунингдек таълим робототехникаси соҳасида икки мамлакат ташкилотлари ўртасида алоқаларни кенгайтиришдан иборат.«Хитой маркази» Кембриж инновацион парки билан ҳам меморандум имзоланди ва Лондонда Ўзбек-Хитой технопарки очиш имкониятлари ҳақида музокаралар олиб борилди.
Изоҳ (0)