Бухоро вилояти Шофиркон туманидаги фермер хўжаликларидан бирининг тракторчиси Т.Қ. хўжалик мансабдорлари билан олдиндан тил бириктириб, тиркама оғирлигини сунъий ошириб, ҳақиқатда топширилмаган 1,6 миллион сўмлик 460 килограмм пахтанинг ортиқча ҳисоблаб ёзилишига эришган. Бу ҳақда Бош прокуратура матбуот хизмати хабар бермоқда.
Бош прокуратура ҳузуридаги Департаментнинг Ромитан туман бўлими ходимлари томонидан Агроинспекциянинг Бухоро вилоят бошқармаси ходимлари билан ҳамкорликда ўтказилган тезкор тадбир давомида фермер хўжалигининг мансабдорлари тиркама оғирлигини сунъий ошириш йўли билан 2018 йилги пахта ҳосилидан аслида топширилмаган жами 21,4 миллион сўмлик 4236 килограмм пахта хом ашёсини «Шофиркон пахта тозалаш» компанияси балансига ноқонуний ўтказганлиги аниқланган.
Хабар беришларича, мазкур ҳолатлар юзасидан фермер хўжалиги мансабдор шахслари ва бошқаларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Изоҳ (0)