Қозоғистон президенти Нурсултон Назарбоев мамлакатнинг Ўзбекистон элчиси Ерик Утембаевни эгаллаб турган лавозимидан вақтинча четлатиш тўғрисидаги фармонни имзолади. «Sputnik»нинг қайд этишича, Утембаев давлат маблағларини талон-торож қилишда гумонланмоқда.
«Давлат раҳбарининг фармони билан Утембаев Ерик Милтиқбаевич Қозоғистоннинг Ўзбекистондаги фавқулодда ва мухтор элчиси лавозим ваколатларини бажаришдан вақтинча четлатилди», — дейилади Қозоғистон президенти сайтида эълон қилинган ахборотда.
Октябрь ойи ўрталарида Қозоғистоннинг коррупцияга қарши кураш миллий бюроси мамлакатнинг Ўзбекистондаги элчиси 140 миллион тенге (тахминан 378 минг доллар) миқдоридаги давлат бюджети маблағларини талон-торож қилганликда гумоланаётганини маълум қилган эди.
Дипломат «масъулиятли давлат лавозимини эгаллагани ҳолда, Қозоғистоннинг Ўзбекистондаги элчихонаси маъмурий биносида қурилиш ишлари бажарилгани ҳақида қасддан сохта ҳужжатларни имзолаганликда гумон қилинмоқда».
Ерик Утембаев 2016 йил апрелида Қозоғистоннинг Ўзбекистондаги элчиси этиб тайинланган эди.
Изоҳ (0)