Ўзбекистон ёшлар иттифоқи раиси Қаҳрамон Қуронбоев Қорақалпоғистонда бўлиб ўтган «Ёшлар спорт ҳафталиги» доирасида таниқли блогер, «Kruz.uz» сайти асосчиси марҳум Фурқат Юсуповнинг онаси билан учрашиб, оила аъзолари ҳолидан хабар олди.
Онасининг айтишича, Қаҳрамон Қуронбоев Фурқатнинг ижодини ва ташкилот тизимидаги фаолиятини юксак қадрлаган. Унинг ижодий ишларидан таркиб топган янги китобини 10 минг нусхада чоп этилишига ваъда берган.
Фурқат Юсупов қисқа умри давомида 6000 дан ортиқ долзарб мавзуларда мақолалар ёзган. Улар яхлит китоб ҳолида чоп этилмаган. Фурқат Юсуповнинг ўзи хомаки нусхада бир нечта китоб чиқарганди. Мана шу китоблар ва энг сара мақолалар китоб ҳолида нашр этиш учун тақдим қилинди. Ҳозирча китобнинг номи маълум эмас. Мазкур китоб Фурқат Юсуповнинг туғилган кунида, яъни жорий йилнинг 11 декабрида чоп этилади.
Йил якунига қадар 10 минг нусхадаги китоблар блогернинг мухлисларига етиб боради.
Маълумот учун, журналист Фурқат Юсупов 1992 йил 11 декабрда туғилган, шу йил 7 июнь куни бахтсиз ҳодиса туфайли ҳалок бўлганди. У асос солган «Kruz.uz» сайти 2016 йилда «Миллий интернет танлови»да «Икки тилда яратилган энг яхши сайт» номинацияси ғолиби бўлган. У ўлимига қадар Ўзбекистон ёшлар иттифоқи Қорақалпоғистон Республикаси Кенгашининг матбуот котиби лавозимида фаолият олиб борганди.
Изоҳ (0)