Тошкентда «Оилани мустаҳкамлаш ва ўсиб келаётган ёш авлодни тарбиялашда ўзини ўзи бошқариш органларининг роли» мавзусида халқаро конференция ўтказилмоқда, деб хабар беради «Mahalladosh.uz».
Конференцияда Афғонистон, Бельгия, Буюк Британия, Испания, Италия, Миср, Покистон, Россия, Озарбайжон, Корея Республикаси, Ҳиндистон, Қирғизистон, Қозоғистон, Тожикистон давлатларидан келган етакчи экспертлар ҳамда мамлакатимизда аккредитациядан ўтган дипломатик корпус вакиллари иштирок этмоқда.
Халқаро конференция иштирокчилари куннинг биринчи ярмида пойтахтдаги Ҳазрати имом мажмуаси, Тошкент шаҳридаги Бадиий гимнастика бўйича болалар-ўсмирлар ихтисослаштирилган республика олимпия захираси спорт мактаби ҳамда Тошкент шаҳридаги 18-сон болалар мусиқа ва санъат мактабида бўлди.
Конференциянинг асосий тадбирлари 28 сентябрь куни пойтахтдаги Интернатинал Ҳотел Ташкент меҳмонхонасида бўлиб ўтади. Шу куни анжуманнинг расмий очилиш маросими, «Баркамол авлод тарбиясида фуқароларнинг ўзини ўзи бошқариш органлари ва оиланинг тутган ўрни», «Оила институти ва оила сиёсати: муаммолар, ривожланиш тенденцияси ва истиқболлари» мавзусида ялпи йиғилишлари, тўртта шўъбада мавзуга доир муҳокамалар ўтказилиши белгиланган.
Тадбир якунида маҳалла институти, оила-никоҳ муносабатлари ва ёшларга оид давлат сиёсати соҳасида қонунчилик ва амалиётни такомиллаштириш бўйича тегишли таклиф ва тавсиялар ишлаб чиқилади.
Изоҳ (0)