ТАТУ ва БДИРУ ўртасида АТ факультети ташкил этилади, битирувчиларга эса қўшма диплом берилади

Бугун, 13 сентябрь санасида Беларусь президенти Александр Лукашенконинг Ўзбекистонга расмий ташрифи доирасида, Муҳаммад ал-Хоразмий номидаги Тошкент ахборот технологиялари университети (ТАТУ) ва Беларусь давлат информатика ва радиоэлектрон университети (БДИРУ) ўртасида информацион технологиялар қўшма факультети (ИTҚФ ТАТУ-БДИРУ)ни ташкил этиш борасида битим имзоланди. Бу ҳақда Ахборот технологиялари ва коммуникацияларини ривожлантириш вазирлиги матбуот хизмати маълум қилди.

Таъкидланишича, шартноманинг мақсади Ўзбекистон иқтисодиёти соҳалари учун ахборот-коммуникация технологиялари тармоғида кадрлар тайёрлаш соҳасида ўзаро манфаатли шартлар асосида алоқаларни ва ҳамкорликни кенгайтиришга интилиш ҳисобланади.

Қўшма факультет битирувчиларига ТАТУ ва БДИРУ томонидан иккита диплом топширилади. Шунингдек, битирувчилар ТАТУ ва БДИРУ да магистратурада ўқишни давом эттиришлари, магистрлик диссертациясини ҳимоя қилишлари ҳамда «магистр» академик даражасини олиш имкониятига эга бўлади.

Шартномага кўра, қўшма факультети мутахассисларини тайёрлаш БДИРУ томонидан жорий этилаётган Беларусь республикасида белгиланган таълим йўналишлари бўйича рус тилида олиб борилади ва жорий қилинади:

• «Ахборот технологияларининг дастурий таъминоти»;
• «Дастурлаштирилган мобил тизимлар»;
• «Сунъий ақл».

Қўшма факультетда таълим ўқишга пул тўлаш шартлари асосида ишлаб чиқилган ва ТАТУ билан келишилган ўқув режалари ва дастурларига мувофиқ икки босқичда жорий қилинади. Биринчи босқич ТАТУда 2 йил давомида Ўзбекистон Республикаси ҳудудида амалга оширилади ва талабаларни биринчи ва иккинчи босқичларда таълим олишларини ўз ичига олади. Таълимнинг иккинчи босқичи Беларусь Республикаси ҳудудида 2 йил давомида олиб борилади, ҳамда талабаларни учинчи ва тўртинчи босқичда билим олишларини назарда тутиб, тегишли мутахассислик даражаси берилишини ўз ичига олади.