Бугун, 31 август куни Ислом Каримов номидаги Тошкент халқаро аэропортида Индонезияда бўлиб ўтаётган XVIII ёзги Осиё ўйинларида Ўзбекистон шаънини ҳимоя қилган ўзбекистонлик спортчилар тантана билан кутиб олинди. Бу ҳақда Мудофаа вазирлиги матбуот хизмати «Дарё»га маълум қилди.
Жакарта ва Палембанг шаҳарларида ўтказилаётган Осиё ўйинларида оғир атлетика спорт тури бўйича Мудофаа вазирлиги Спорт клуби аъзоси, шартнома бўйича ҳарбий хизматчи оддий аскар Руслан Нурудинов Осиё ўйинлари олтин медалига сазовор бўлди. У даст кўтаришда 191 кг, силтаб кўтаришда эса 230 кг тошни ўзига бўйсундириб, умумий 421 кг натижа билан рақибларидан устун келди. Руслан шу билан бирга Осиё ўйинлари рекордини ҳам янгилади.
Шунингдек, Ўзбекистон шарафини 69 кг вазнда ҳимоя қилган Мудофаа вазирлиги спорт клуби оғир атлетикачиси Достон Ёқубов 331 кг натижа билан кумуш медаль соҳибига айланди. Армия спортчилари Адҳамжон Эргашев ҳамда Рустам Жангабоев эса ўз вазн тоифаларида (+105 кг ва -62кг) бронза медалларини қўлга киритишга муваффақ бўлди.
Бундан ташқари енгил атлетикачимиз Надя Дусанова 1,94 сантиметрлик натижани қайд этган ҳолда ўз шахсий рекордини янгилади ва кумуш медалга эга бўлди.
Тантанали кутиб олиш маросимида Ўзбекистон миллий олимпиа қўмитаси, Оғир ва енгил атлетика федерацияси вакиллари, Мудофаа вазирлиги спорт клуби масъуллари, спортчи ёшлар ҳамда ғолиб ва совриндорларнинг оила аъзолари иштирок этди.
Ўзбекистон Республикаси Қуролли Кучлар академияси ҳарбий оркестри жамоаси ўз куй-қўшиқлари билан тантанага байрамона тус бағишлади.
Изоҳ (0)