Президент фармонига мувофиқ 100 ёшдан ошган бир гуруҳ ўзбекистонликлар «Шуҳрат» медали билан тақдирланди. Улар орасида Янгиқўрғон туманида яшовчи 108 ёшли Бухалча момо Дармонова ҳам бор. Бу ҳақда туман ҳокимлиги ахборот хизмати маълум қилди.
Бухалча момо туманда биринчилардан бўлиб пилла етиштириш ҳадисини олган. Ҳудуддаги хўжаликларни ташкил этиш жараёнида фаол қатнашган, қишлоқни ободонлаштириш, янги ерларни ўзлаштиришда жонбозлик кўрсатган. Умумий меҳнат стажи эса 40 йилдан ошиқ.
Онахон турмуш ўртоғи билан 4 фарзандни вояга етказди, ҳозирда 21 набира, 60 чевара ва 4 нафар эварага бош.
У кишини айём арафасида қутлаш учун вилоят ҳокимлиги мутасаддилари, давлат ва жамоат ташкилотлари, ОАВ вакиллари Бирлашган қишлоғидаги хонадонга келди. Вилоят ҳокими Хайрулло Бозоров Президент номидан момони табриклаб, «Шуҳрат» медалини тақди, байрам совғаларини топширди.
Қайд этиш жоизки, «Шуҳрат» медали билан тақдирланганлар сафида тумандаги «Мўғол» МФЙ раиси Абдурасул Ҳайитов ва туман ИИБ профилактика инспектори Олимжон Булутов ҳам бор.
Изоҳ (0)