Ўзбекистон боғчаларида 6 ёшли болалар учун синов гуруҳлари ташкил этилади

27 август куни Мактабгача таълим вазирлиги «2018–2019 ўқув йилида мактабгача таълим тизимини ривожлантиришининг стратегик устуворликлари – ҳаммабоплик ва сифат» биринчи йиллик анжуманини ўтказди. Бу ҳақда вазирлик матбуот хизмати «Дарё» га маълум қилди.

Ушбу анжуманда тизимда жорий этилган янгиликлар хусусида ҳам сўз борди.

Болаларни мактабга мажбурий бепул бир йиллик тайёрлашга босқичма-босқич ўтиш мақсадида қатор MTMларда жорий йил кузида 6 ёшли тарбияланувчилар учун синов гуруҳлари йўлга қўйилади. Ҳозирда мактабгача тайёргарликни ташкил этиш учун гуруҳ хоналарини тайёрлаш ва малакали педагогик кадрларни қабул қилиш ишлари амалга оширилмоқда.

Мактабга тайёрлов гуруҳлари икки сменада ишлайди. Гуруҳда болалар сони 30 тадан ошмайди.

Шунингдек, конференция давомида мактабгача таълим сифатини ошириш масалалари муҳокама этилди. Тақдим этилган Кичик ва мактабгача ёшдаги болаларни ривожлантиришга давлат талаблари ва ЮНИСЕФ халқаро болалар фонди билан биргаликда халқаро экспертлар иштирокида ишлаб чиқилган «Илк қадам» давлат ўқув дастури компетентлик ёндашувга асосланади ва илғор хорижий тажрибани ўзида акс эттириб, шахснинг ҳар томонлама шаклланиши, болада мотивацияни рағбатлантиришни, нафақат тарбиячи, балки ота-оналар ҳам фойдаланадиган ютуқлар картасини жорий қилишни назарда тутади.

«Мактабгача таълим муассасаси – бу ўзига хос олам, унда болалар, ота-оналар, тарбиячилар ва ходимлар манфаатлари тўқнаш келади. Биз ҳар бир мактабгача таълим муассасасида бола ўзини қулай, хавфсиз ва манзур сезиши учун учун биргаликда барча ишларни амалга оширишимиз лозим, токи бола у ерга қувонч билан қатнасин»,– қайд этди мактабгача таълим вазири Агриппина Шин.