Сирдарё вилояти божхона бошқармаси «Ховособод» чегара-божхона пости ходимлари шахсий эҳтиёж учун деган ниқоб остида, аслида тижорат мақсадида телевизорларнинг олиб кирилишига доир қонунбузарлик ҳолатини фош қилишди. Бу ҳақда божхона қўмитаси ахборот хизмати «Дарё»га хабар берди.
Яъни, қонунбузарлар томонидан пост орқали ҳаракатланаётган жисмоний шахслар маълум бир ҳақ эвазига телевизорларни доналаб ташиш учун ёлланган. Олиб ўтилган телевизорлар эса фуқаро З.М.нинг хонадонига тўплаб борилган.
Тезкор тадбир давомида ушбу хонадонда жамланган 3 турдаги 32 дона телевизор автомашинага ортилаётган вақтда тўхтатиб қолинди. Маълум бўлишича, телевизорлар қўшни давлат фуқароси М.А.га тегишли бўлиб, уларнинг қиймати 24 миллион сўмни ташкил қилмоқда.
Ҳозирда мазкур ҳолатлар юзасидан текширув ҳаракатлари давом эттирилмоқда.
Изоҳ (0)