Осиё ўйинлари—2018. Жакартадаги очилиш маросимидан экслюзив фотогалерея

Бугун, Тошкент вақти билан соат 18:08 да Жакартада Осиё ўйинларининг расмий очилиш маросими бошланди. XVIII ёзги Осиё ўйинларига тарихда илк бор иккита шаҳар – Жакарта ва Палембанг мезбонлик қилмоқда.

Расмий маросимда Gelora Bung Karno Stadium’ни бошқа иштирокчилар қаторида Ўзбекистон спорт делегацияси ҳам тантанали тарзда айланиб ўтди. Боксчи Исроил Мадримов мамлакат делегацияси байроқдори вазифасини бажариб берди.

Қайд этиш лозим, Ўзбекистондан 331 нафар спортчи иштирок этаётган мусобақанинг очилиш маросимида делегациянинг 50 нафарга яқин аъзоси қатнашди. «Дарё» мухбири хабарига кўра, параддаги иштирокчиларнинг камроқ бўлиши бир неча сабаблар билан боғлиқ.

Жумладан, Индонезиянинг иссиқ ва ўта нам об-ҳавоси спортчиларнинг терлашига олиб келади, бунинг натижасида организмдан кўп миқдорда туз ва бошқа фойдали моддалар чиқиб кетади. Шунингдек, терма жамоанинг барча аъзолари Жакартада жойлашган эмас. Масалан, футболчилар Багорда, эшкак эшувчилар, каноечилар ва теннисчилар Палембангда. Боиси, улар айнан мусобақаси бўладиган жойларга яқин жойлашган. Албатта, қулай бўлиши учун. Яна бир асосий сабаблардан бир эса мусобақадаги иштирокини эртадан бошлайдиган спортчилар айни пайтда машғулотларга асосий эътиборини қаратмоқда. Барчаси ўйланган ҳолда Ўзбекистон делегацияси бир мунча ихчамроқ таркибда очилиш маросимида қатнашди.

Маълумот учун, ўзбекистонлик спортчилар 30 спорт тури бўйича Ўзбекистон шарафини ҳимоя қилади. 19 август санасидан бошлаб, сузиш, ушу, эркин кураш, ўқ отиш, қиличбозлик, академик эшкак эшиш ва теннис баҳсларида спортчилар ўз иштирокларини бошлайди.

Жакарта-2018да Ўзбекистонлик атлетлар қуйидаги спорт турларида медаллар учун курашади (қавс ичида спортчилар сони кўрсатилган): каное / спринт (23), эшкак эшиш (22), дзюдо (20), футбол (20), енгил атлетика (17), жиу-жицу (17),таэквондо (16), гандбол (16), эркин кураш (16), кураш (15), сув полоси (13), оғир атлетика (13), бокс (11), пенчак силат (11), карате (10), велоспорт / шоссе ва трек (10), синхрон сузиш (10), теннис (9) самбо (8), триатлон (6), спорт гимнастикаси (7), ўқ отиш (5), сузиш (5), гольф (5), каное / слалом (4), от спорти (4), қиличбозлик (4), бадиий гимнастика (4), гимнастика / трамполин (4), ушу (4), сувга сакраш (1), бадминтон (1). Жами – 331 нафар спортчи.

Б галги Осиё ўйинларида жами 40 та спорт тури бўйича 67 та йўналишда беллашувлар ўтказилади. Жами 465 та медаллар жамланмаси учун Осиё олимпия кенгашига аъзо барча 45 мамлакат вакиллари кураш олиб боришади. Мусобақага ташриф буюрган спортчи, мураббий ва расмий шахсларнинг умумий сони 15 мингдан ошади.