Нидерландиянинг қишлоқ хўжалиги соҳасини ҳар томонлама ривожлантиришдаги илғор тажрибасини ўрганиш, давлатлар, хусусий сектор ва таълим муассасалари ўртасида самарали ҳамкорликни йўлга қўйиш мақсадида Қишлоқ хўжалиги вазирининг ўринбосари Саидкамол Хўжаев бошчилигидаги делегация Ниделандияда бўлди. Бу ҳақда «Дарё»га вазирлик ахборот хизмати маълум қилди.
Ташрифнинг илк кунида Нидерландия қироллиги қишлоқ хўжалиги, атроф-муҳит ва озиқ-овқат сифати вазири ўринбосари Марелин Соннема билан учрашув ўтказилди. У Ўзбекистонда қишлоқ хўжалигидаги ислоҳотлар, иқтисодиётдаги илғор технологиялар ва ишланмаларни жалб қилиш бўйича кўрилаётган чора-тадбирларнинг натижаларини юксак баҳолади. Шунингдек, ўзбек деҳқонларининг билим ва кўникмаларини мустаҳкамлашда Нидерландия ҳукумати кўмак кўрсатишга тайёр эканлиги маълум қилди. Музокаралар якунида томонлар ўртасида ўзаро ҳамкорликнинг асосий йўналишлари акс эттирилган протокол имзоланди.
—Ўзбекистондаги ўзгаришлар мамлакатга сармоя киритмоқчи, билим ва тажрибаси билан бўлишмоқчи бўлган Нидерландия компанияларида катта қизиқиш уйғотмоқда. Биз боғдорчилик, чорвачилик, паррандачилик, сут маҳсулотларини қайта ишлаш соҳаларида кенг имкониятларни кўряпмиз, — дейди Марелин Соннема.
Ташриф давомида делегация вакиллари қишлоқ хўжалиги соҳасида жаҳонда етакчи олий таълим муассасаларидан бири – Вагенинген университетининг тадқиқот марказида ҳам бўлди. Марказ халқаро миқёсда қишлоқ хўжалиги учун мутахассислар тайёрлайди. Унда дунёнинг 100 давлатидан 10 мингга яқин талаба билим олади, инновацион ишланма ва дастурлар амалга оширилади. Марказ ҳукумат, хусусий компаниялар, таълим муассасаларининг ўзига хос платформаси ҳисобланади.
Нидерландияда боғдорчилик иқтисодий ривожланишнинг 9 та устувор йўналишларидан бири сифатида белгиланган. Ташриф давомида делегация аъзолари учун боғдорчиликнинг асосий йўналишлари ҳамда таянч маълумотлар тақдимоти бўлиб ўтди.Университетнинг илмий-амалий иссиқхона комплекси билан ҳам танишилди. Бу ерда илмий ишланмаларни қўллаш ва қишлоқ хўжалиги экинларини етиштиришдан манфаатдор бўлган хусусий компаниялар буюртмаларини бажариш бўйича тадқиқотлар ўтказилади.
Делегацияаъзолари ташриф буюрган кейинги объект нидерландиялик ишлаб чиқарувчилар уюшмаси бўлди. Мазкур ассоциация агрокомпанияларни бирлаштиради ҳамда мева-сабзавотлар маркетинги билан шуғулланади. Статистикалар шуни кўрсатмоқдаки, бугунги кунда Нидерландия етиштирилаётган мева-сабзовотларнинг 80 фоизи уюшма аъзолари улушига тўғри келади. Уларнинг жаъми айланмаси эса йилига 12 миллиард евродан ошади.
Уюшма раҳбарияти ички ва ташқи бозорларга қишлоқ хўжалиги маҳсулотларини етказиб бериш занжирини яратишда тажриба алмашиш бўйича ўзбекистонлик фермерлар билан ҳамкорлик қилиш истагини билдирди. Бундан ташқари Нидерландия томони Европа Иттифоқи ва бошқа давлатлар бозорларига кириш, маҳсулотларни сертификациялаш ва логистика бўйича кўникмаларни ошириш бўйича ҳар томонлама ёрдам беришга тайёрлигини билдирди.
Учрашув давомида тадбиркорликни қўллаб-қувватлаш бўйича Нидерландия агентлигида деҳқончилик хўжаликларини меҳанизациялаш, паррандачилик фирмалари учун асбоб-ускуналарни ишлаб чиқариш ва Ўзбекистон деҳқонлари учун уруғлар ва зотдор молларни етказиб берувчи компаниялар вакиллари билан ҳам музокаралар ўтказилди. Голландиялик ҳамкорлар Ўзбекистонда Нидерландия компаниялари учун техник марказ ташкил этиш режаси борлигини маълум қилди.
Изоҳ (0)