Бугун,

  • USD 10940.05
  • RUB 182.26
  • EUR 11121.65

Ўзбекистонда соат 21:00 дан кейин спиртли ичимлик сотишни тақиқлашга оид билдирилаётган амалий таклифлар кенг жамоатчилик томонидан қизғин қўллаб-қувватланмоқда, дея хабар бермоқда ЎзА.

Фото: «Газета.uz»

Фото: «Газета.uz»

Ўзбекистон бош вазири Абдулла Арипов 11 август куни бўлиб ўтган селектор йиғилишида чакана савдода 21:00 дан бошлаб, тантанали маросимлар ўтказиладиган муассасаларда эса 23:00 дан бошлаб спиртли ичимликлар савдосини чеклаш ҳақида кўрсатма бергани маълум бўлган эди.

Республика Маънавият ва маърифат маркази бўлим бошлиғи Эргаш Даминовнинг айтишича, «алкоголь сотишни чеклаш, уни муайян вақт чегарасида тизимга солиш ташаббуси кўпгина кўнгилсизликларнинг олдини олиши шубҳасиз».

«Масаланинг иккинчи томони — кечки пайт оила даврасида катталар фарзандлари кўз ўнгида қадаҳ уриштириб ўтириши бола тарбиясига ҳам, маънавиятига ҳам салбий таъсир кўрсатиши муқаррар. Унинг ўрнига ота болаларига қизиқарли китоб ўқиб берса ёки бирор ҳикматли воқеани сўзласа, боланинг феъли-атвори, тарбиясига нечоғли ижобий таъсир кўрсатади. Биз — қалбида иймони собит халқмиз. Шу маънода ўзимизни, фарзандларимизни, уларнинг келажагини турли иллатлардан омон сақлаш ҳар бир ота-онанинг бурчидир», — дейди Даминов.

Тошкентнинг Шайхонтоҳур туманидаги «тунги кафелар ва дискотека клублари фаолиятига барҳам берилган» «Янгиобод» маҳалла фуқаролар йиғини раиси Манзура Валиеванинг сўзларига кўра, «ичкиликдан ҳали ҳеч ким барака топмаган».

«Кечки пайт спиртли ичимликлар билан савдо қилмасликка оид ташаббусни барча тўла қўллаб-қувватлайди. Зеро, бу ташаббус оилалар бузилишининг олдини олишда, ҳуқуқбузарликлар профилактикасини янада кучайтиришда, фуқароларнинг ўз юрти, оиласи, фарзандлари учун масъулиятини оширишда, ёшлар тарбиясини тўғри йўлга қўйишда ғоят муҳим қадам бўлади. Жамоатчилик саъй-ҳаракати билан маҳалла ҳудудига яқин жойлардаги тунги кафелар, дискотека клублари ишига барҳам бердик. Алкоголь савдоси вақтини тартибга солишга оид ижобий таклиф-ташаббус оилалар, ёшлар, қўйингки, уни истеъмол қиладиганлар учун ҳам, энг муҳими, жамият ва келажак учун фақат ва фақат наф келтиради», — дейди маҳалла раиси.

ЎзАнинг ёзишича, «спиртли ичимлик савдосини кечки пайт тақиқлашга оид ташаббус кенг жамоатчилик томонидан қўллаб-қувватланмоқда». Агентликнинг қайд этишича, бу «фарзандлар тарбияси, оилалар тотувлиги, жамиятдаги ўзаро аҳил ва ҳамжиҳатлик муҳитининг барқарорлиги билан чамбарчас боғлиқдир».

Маълумот учун, Президент Шавкат Мирзиёев раислигида 3 август куни виночилик соҳасини ривожлантириш, алкоголли маҳсулотлар ишлаб чиқариш ва экспорт қилишни кенгайтириш масалаларига бағишланган йиғилиш ўтказилган эди. Унда Президент ароқ ишлаб чиқариш қувватларидан фойдаланиш даражаси ярим йилда 71 фоизни, вино – 57 фоизни, спирт – 76 фоизни, шампан виноси – 7 фоизни ташкил этганини танқид қилганди.

Изоҳ
Асосий янгиликлар