Ўзбекистон ташқи ишлар вазири Абдулазиз Комилов 4 август куни Тошкентда Ҳиндистон ташқи ишлар вазири Сушма Свараж билан учрашди. Бу ҳақда Ўзбекистон ТИВ матбуот хизмати хабар бермоқда.
Учрашув чоғида ташқи сиёсат идоралари раҳбарлари умумий кун тартибининг асосий масалаларини муҳокама қилган ҳамда халқаро ва минтақавий муаммолар борасида фикр алмашган.
Икки томон ҳам сиёсий, савдо-иқтисодий, инвестицион, туристик, маданий-гуманитар ва бошқа соҳалардаги ҳамкорликни янада ошириш учун мавжуд имкониятларни амалга ошириш борасида биргаликда ишлашга тайёр эканлиги таъкидланган.
«Вазирлар Ўзбекистон раҳбарининг кузда Ҳиндистонга бўлажак давлат ташрифига тайёргарликнинг амалий жиҳатларини кўриб чиқди», — дейилади ТИВ ахборотида.
Афғонистонда тинчлик ўрнатиш жараёнига ҳамда унинг ижтимоий-иқтисодий ривожланишига кўмаклашиш бўйича Ўзбекистон ва Ҳиндистон ҳамкорлигининг истиқболларига ҳам алоҳида эътибор қаратилган.
Изоҳ (0)