АҚШда хиёбонларда ухлаб, ўткинчиларга резюме тарқатган уйсиз йигит Google ва Netflix’дан ишга таклиф олди

АҚШнинг Техас штатида яшовчи 26 ёшли Дэвис Касарес 2017 йилнинг сентябрь ойида ўз стартапини ишга туширишни орзу қилиб, Остиндан Кремний водийсига кўчиб ўтган. Касарес коллежни тугатган ва General Motors’га ишга жойлашган, у ерда сифат назорати мутахассиси лавозимидан веб-дастурчи лавозимигача бўлган йўлни босиб ўтган. Кўчиб ўтиш учун у бир нечта маошига тенг суммани йиғган, деб ёзмоқда Meduza.

Касарес Кремний водийсида турар жойи харажатлари ва иш ўрни учун юқори рақобатни ҳисобга олмаган. Шунинг учун қисқа вақт ичида унда квартира ижараси учун пул тугаб қолган.

Бир йилдан кўпроқ вақт давомида дастурчи ўз фургонида яшаган, бироқ кейинчалик тўланмаган банк кредити учун фургон олиб қўйилган. Шунда Касарес хиёбонларда тунни ўтказишни бошлаган. 2018 йилнинг июнь ойида дастурчининг сўнгги пуллари ҳам тугаган, июль ойида эса у кўчага «Мен уйсизман. Муваффақиятга ташнаман», деб ёзилган панно билан чиққан. Дастурчи ўткинчилардан пул сўрамаган — у ўзининг резюмесини тарқатган.

Twitter’даги @jaysc0 тахаллусли фойдаланувчи 27 июлда Касаресни кўриб қолган ва дастурчини суратга олиб, ўзининг аккаунтига жойлаштирган ва унга ёрдам беришга чақирган. Фойдаланувчининг сўзларига кўра, унинг ўзи Кремний водийсида ўрнини топиш учун уч йил уринган ва яқинда бунга эришган, шунинг учун у Касаресга ёрдам беришга қарор қилган.

Технологик компаниялар ва бизнес тренинглар ўтказувчи мактаблар фойдаланувчининг хабарига тезда эътибор қаратган. Касаресга аллақчон вақтинчалик турар жой таклиф қилинган. Бундан ташқари, дастурчи суҳбат учун 200 дан ортиқ таклиф олган, шу жумладан, Google, Netflix, LinkedIn ва Pandora компанияларидан.