Бухоро вилоятининг Жондор туманида 70 нафар ишсиз хотин-қиз учун янги корхона фойдаланишга топширилди. Улардан 40 нафарини оғир ижтимоий аҳволга тушиб қолган аёллар ташкил қилади, деб хабар берди «Дарё» мухбири Фарҳод Норбўтаев.
Янги ташкил этилган корхонада фаолият юритадиган хотин-қизлар тикувчилик, сартарошлик, кўрпадўзлик, сўзана тикиш, қурилиш ва бўёқчилик каби фаолият турлари билан шуғулланиб, доимий ишга эга бўлди.
Бош вазир ўринбосари, Ўзбекистон Хотин-қизлар қўмитаси раиси Танзила Норбоева иштирок этган тадбирда корхонага ишга кирган барча аёлларга меҳнат дафтарчалари топширилди. Қайд этиш жоизки, иш вақтида бўлган аёлларнинг фарзандлари учун ҳам махсус кичик гуруҳлар ташкил этилиб, уларга педагог ва психологлар бириктирилди.
Маълумот учун, шу йилнинг ўтган 6 ойи давомида Бухоро вилоятида 2 мингдан ортиқ аёл доимий иш билан таъминланди.
Ўзбекистон Хотин-қизлар қўмитасига кўра, аёлларни қўллаб-қувватлаш, уларнинг бандлигини таъминлаш мақсадида бошқа вилоятларда ҳам барча шарт-шароитларга эга бўлган шундай корхоналар ишга туширилмоқда.
Изоҳ (0)