Ўзбекистон Ички ишлар вазири, генерал-майор Пўлат Бобожонов бошчилигидаги делегация Озарбайжон пойтахти Бокуда ўтказилган МДҲга аъзо давлатлар ички ишлар вазирлари кенгашининг навбатдаги йиғилишида иштирок этди. Бу ҳақда ИИВ жамоатчилик ва ОАВ билан алоқалар бошқармаси хабар берди.
Йиғилишда Озарбайжон, Беларусь, Қозоғистон, Қирғизистон, Молдова, Тожикистон, Туркманистон, Ўзбекистон, Россия Федерацияси, МДҲ Ижроия қўмитаси, МДҲга аъзо давлатлар ҳудудларида уюшган жиноятчилик ва жиноятларнинг бошқа хавфли турлари билан курашишни мувофиқлаштириш бюроси, Интерпол ва Марказий Осиё минтақавий ахборот ва мувофиқлаштириш маркази вакиллари иштирок этди.
Учрашувда олдиндан тасдиқланган кун тартибига мувофиқ 10 та масала муҳокама қилинди.
Кенгашда сўзга чиққан Ўзбекистон Ички ишлар вазири йиғилганларни тизимда олиб борилаётган ислоҳотлар, давлатлараро турли турдаги жиноятлар билан курашиш дастури бажарилиши билан таништирди.
Кун тартибидаги масалаларни кўриб чиқиш натижалари бўйича МДҲ ички ишлар вазирлар кенгашининг тегишли қарорлари имзоланди.
Кенгашнинг навбатдаги йиғилиши 2019 йилда Ўзбекистонда бўлиб ўтади.
Изоҳ (0)