Ўзбекистонда «Ёш китобхон» танловининг иккинчи мавсуми бошланди

Ўзбекистонда «Ёш китобхон» танловининг иккинчи мавсуми бошланди. Бу ҳақда «Дарё»га Ёшлар медиа маркази маълум қилди.

12 июль куни соат 07:00да барча шаҳар-туманларда танлов ўтказиш учун шай этиб қўйилган аудиторияларга электрон тест дастурлари етказилди. Дастур пароли муҳрланган. Конверт кузатувчилар, маҳаллий ташкилий қўмита аъзолари ва ОАВ вакиллари иштирокида очилди ва соат 08:00га қадар аудиториядаги барча компьютерларга ўрнатилди.

Тест синовлари соат 9:00 да белгиланган аудиторияда бошланди. Синовлар танлов иштирокчилари сонидан келиб чиқиб, соат 18:00 гача давом этиши мумкин.

Танлов иштирокчилари ўз хоҳишига кўра ўзбек ёки рус тилида тест синовларидан ўтишлари мумкин.

«Ёш китобхон» танловининг 3 ёш тоифаси бўйича саралаш босқичлари шу тартибда кетма-кет уч кун ўтказилади.

Маълумот учун, бу йил ушбу танловда қатнашиш учун 720 минг ёш мурожаат этди. Ўтган йили уларнинг сони 250 минг кишини ташкил этган ва ғолиблар Президент совғаси — енгил автомашинага эга бўлганди.