Ўзбекистонда нодавлат олий таълим муассасалари очилиши кутилмоқда. Бу Норматив-ҳуқуқий ҳужжатлар лойиҳалари муҳокамаси порталида муҳокамага қўйилган «Нодавлат олий таълим хизматлари кўрсатувчи юридик шахсларга қўйиладиган талабларни тасдиқлаш тўғрисида»ги қарор лойиҳасида белгиланган.
Ҳужжат Вазирлар Маҳкамаси ҳузуридаги Таълим сифатини назорат қилиш давлат инспекцияси томонидан тақдим этилган.
Унда нодавлат олий таълим хизматлари кўрсатувчи юридик шаҳсларга бир қатор талаблар белгиланган.
Улар қуйидагилардан иборат:
Ўзбекистон Республикасининг таълим соҳасидаги қонун ва қонуности ҳужжатларига риоя қилиш;
Нодавлат олий таълим муассасаси ва нодавлат олий таълим хизматлари кўрсатувчи юридик шахслар бошқаруви ва ўқув биноларидан эгалик ҳуқуқини тасдиқловчи ҳужжатнинг мавжудлиги;
Ёнғин хавфсизлиги ва санитария-эпидемиология назорати органларининг мавжуд бинолар ва хоналарнинг ёнғин хавфсизлиги талабларига ва санитария-гигиена нормаларига мувофиқлиги тўғрисидаги хулосалари;
Умумий ўқув аудиториялари (синфлар), ўқув-техник воситалар билан жиҳозланган ўқув хоналари, умумназарий ва умумтаълим фанлари бўйича лаборатория хоналари, техник ва махсус лаборатория хоналари, компьютер заллари (синфлари), чет тили дарслари учун лингафон кабинетлари, алоҳида кабиналарга ажратилган фонозаллари, курс лойиҳаси ва малакавий битирув ишларини бажариш заллари, ахборот ресурс маркази (кутубхона), спорт заллари ва майдонлари, мажлислар заллари, ректорат, факультет, кафедра, ўқув ва ёрдамчи бўлимлар ва ҳоказо жойларнинг норматив-ҳуқуқий ҳужжатларда белгиланган талабларга мувофиқ бўлиши;
Хизмат кўрсатиш ва турар жой майдонлари: овқатланиш жойлари (ошхона, буфет), тиббий хизмат кўрсатиш жойлари, талабалар турар жойларининг норматив-ҳуқуқий ҳужжатларда белгиланган талабларга мувофиқ бўлиши;
Таълим дастурларини тўлиқ амалга ошириш учун муассаса бинолари, аудитория, ўқув ва лаборатория хоналари ҳамда уларнинг замонавий талабларга мос ахборот коммуникация технологиялари ҳамда ўқитишнинг техник воситалари ва анжомлари, лаборатория жиҳозлари билан тўлиқ таъминланганлиги;
Ахборот-ресурс маркази фондининг белгиланган меъёрлар бўйича талабалар сонига мос равишда керакли ўқув, ўқув-услубий ва илмий адабиётлар билан таъминланганлиги. Бундан ташқари соҳа бўйича илмий-оммабоп нашрлар ва норматив-ҳуқуқий ҳужжатлар тўпламларига обуна бўлганлиги;
Нодавлат олий таълим ташкилотлари профессор-ўқитувчиларининг илмий педагогик салоҳияти камида республика бўйича олий таълим муассасаларидаги ўртача кўрсаткичдан паст бўлмаслиги;
Таълимнинг дунёвий характерда бўлиши.
Изоҳ (0)